APR FC yongeye kwisanga mu Misiri, Rayon yisanga muri Tanzania

Ku nshuro ya Gatatu yikurikiranya, ikipe y’Ingabo yongeye kwisanga mu nzira irimo Pyramids FC yo mu Misiri mu irushanwa rya CAF Champions League, mu gihe Rayon Sports yatomboye Singida Black Stars yo muri Tanzania.

Kuri uyu wa Gatandatu, ni bwo habaye tombora y’ijonjora rya mbere ry’ibanze mu marushanwa Nyafurika ya CAF Champions League na CAF Confederation Cup. Ni umuhango wabereye muri Tanzania ahari kubera irushanwa ry’Igikombe cya Afurika cy’abakina imbere muri za shampiyona z’iwabo [CHAN 2024].

Yasize amakipe ahagarariye u Rwanda muri aya marushanwa, amenye ayo bizahura mu ijonjora rya mbere ry’ibanze. APR FC yisanze igomba guhura na Pyramids FC yo mu Misiri inabitse igikombe cy’umwaka ushize cya CAF Champions League.

Iyi kipe imaze kuba imwe mu zikomeye ku Mugabane wa Afurika, ni yo yasezereye ikipe y’Ingabo mu mwaka ushize w’imikino. Ni ku nshuro ya gatatu yikurikiranya aya makipe yombi agiye kongera guhurira muri iri rushanwa.

Rayon Sports yo, yisanze izahura na Singida Black Stars yo muri Tanzania. Iyi kipe iri mu nziza zikina shampiyona ya Tanzania, mu mwaka ushize w’imikino yabaye iya Kane mu makipe 16 akina shampiyona. Ubu iri gutozwa na Gamondi uherutse gutoza Yanga SC ndetse uherutse no kuvugwa muri APR FC.

Aya makipe ahagarariye u Rwanda, ni yo azabanza kwakira imikino ibanza iteganyijwe gukinwa hagati ya tariki 19-21 Kanama 2025.

UMUSEKE.RW