Abasirikare 163 basoje imyitozo ikakaye bahawe n’ingabo za Qatar

Abasirikare bagera kuri 163 mu ngabo za RDF basoje imyitozo ikakaye bahawe n’ingabo za Qatar zifatanyeje n’iz’u Rwanda, iyi myitozo yo ku rwego rwo hejuru imara ibyumweru bitandatu yabereye mu kigo cya gisirikare cya Gako.

Umugaba Mukuru w’Ingabo z’u Rwanda, Gen MK Mubarakh ni we wasoje iyi myitozo.

Mu bandi bitabiriye uyu muhango harimo umuyobozi ushinzwe ibikorwa muri Ambasade ya Qatar i Kigali, Ali Bin Hamad, ba Offisiye bo ku rwego rwa General mu ngabo z’u Rwanda n’abandi bahagarariye ingabo za  Qatar.

Amasomo abasirikare bahawe arimo ibyiriro bine nk’uko urubuga rwa RDF rubivuga; bahuguwe ku bijyanye no kurinda abanyacyubahiro, kurwanya iterabwoba, guhangana n’imyigaragambyo no kurwanira ahantu hari inyubako.

RDF ivuga ko aya mahugurwa agamije guha igisirikare cy’u Rwanda abantu bafite imyitozo yo hejuru mu guhangana n’ibibazo byateza umutekano muke, kurinda abanyacyubahiro, guhangana n’iterabwoba no kurinda umutekano w’abaturage.

Umugaba Mukuru w’Ingabo z’u Rwanda, Gen MK Mubarakh yashimiye ingabo za Qatar ku bufatanye bwazo n’iz’u Rwanda, ashimira abatoza bafite ubumenyi bwo hejuru mu ngabo za Qatar, uburyo mu bihe bitandukanye bahuguye abapolisi n’abasirikare b’u Rwanda bakabaha ubumenyi bwihariye bwakenerwa mu bihe bidasanzwe.

Yavuze ko igisirikare cy’u Rwanda kizakomeza kwiyubaka no gushaka abafatanyabikorwa hanze yacyo mu rwego rwo kurinda umutekano w’igihugu n’Akarere muri rusange.

Ati “Kuba mwiteguye mu mutekano w’ubu ntabwo bisaba kugira inzego zikomeye gusa, biranasaba kugira abantu bafite imyitozo, bashobora kugira icyo bakora igihe habaye igihungabanya umutekano mu buryo bwagutse.”

Maj Nader Alhajri, ukuriye abatanze amahugurwa ku ruhande rwa Qatar yavuze ko imyitozo izafasha urwego rwa Military Police mu gisirikare cy’u Rwanda gukora neza inshingano zabo kandi kinyamwuga.

Iyi myitozo yitabiriwe na ba Ofisiye n’abasirikare bafite amapeti mato atandukanye.

AMAFOTO @RDF

UMUSEKE.RW