Abakinnyi 11 bazahagararira u Rwanda muri “Kigali Peace Marathon”

Ishyirahamwe ry’Imikino Ngororamubiri mu Rwanda (RAF), ryemeje ko abakinnyi 11 ari bo bazahagararira Igihugu mu isiganwa mpuzamahanga ryitiriwe Amahoro, Kigali International Peace Marathon igiye gukinwa ku nshuro ya 20.

Urutonde ndakuka rw’amazina y’aba bakinnyi rwatangajwe na RAF biciye ku mbuga nkoranyambaga zirimo X. Aba bakinnyi, harimo abazasiganwa muri marato yose (Full Marathon) n’abazasiganwa mu gice cya marato mu bagabo n’abagore (Half Marathon).

Abagabo bazasiganwa muri marato, ni Ntirenganya Fidèle (Sina Gérard AC) na Hitimana Noel (APR AC). Abagabo bazasiganwa mu gice cya marato, ni Ingabire Victor (APR AC), Manirafasha Primier (Sina Gérard AC), Nshimiyimana Emmanuel na Nsabimana Jean Claude bombi ba APR AC.

Abagore bazasiganwa mu gice cya marato, ni Imanizabayo Emeline (Sina Gérard AC), Niyonkuru Florence (Sina Gérard AC), Uwizeyimana Jeanne Gentille (Police AC), Ibishatse Angelique (APR AC) na Musabyeyezu Adeline nawe ukinira APR AC.

Aba bakinnyi bose, bahise bajyanwa mu mwiherero uzageza igihe irushanwa rizabera. Karasira Eric na Kanyabugoyi Anicet, ni bo batoza b’iyi kipe. Biteganyijwe ko iri siganwa mpuzamahanga ngarukamwaka, rizakinwa ku wa 8 Kamena 2025.

Kwiyandikisha ku bazitabira iri rushanwa byamaze gutangira aho bikorerwa ku rubuga rwaryo.

Abanyamahanga bishyura 80$ na 77€, abaturutse muri Afurika y’Iburasirazuba bakishyura 60$ na 57€ mu gihe ababa mu Rwanda bishyura 8000 Frw nk’uko bimeze ku Banyarwanda.

Abazasiganwa mu cyiciro cya “Run for Peace” bazishyura 5000 Frw, abaziyandikishiriza hamwe nk’ikigo bazishyura 1000$, abanyacyubahiro bishyure 500$. Ni mu gihe abanyeshuri n’abatarengeje imyaka 18 bo bemerewe kwitabira batishyuye, ariko bariyandikishije.

Mu isiganwa rya, biciye ku Banyarwanda babiri, Mutabazi Emmanuel na Imanizabayo Emeline, u Rwanda rwegukanye umudali wa Bronze nyuma y’uko aba bombi babonye umwanya wa Gatatu mu bagabo n’abagore basiganwe mu cyiciro cya Half Marathon muri ’Kigali International Peace Marathon 2024’ yabaye ku wa 9 Kamena 2024.

Mu mwaka ushize, Umunya-Kenya, Laban Korir yegukanye ’Kigali International Peace Marathon 2024’ mu bagabo akoresheje amasaha abiri, iminota 16 n’amasegonda atandatu. Uyu yakurikiwe na mwenewabo Cornelius Kipeti Kiplagat wasizwe amasegonda 12 gusa. Iki kikaba aricyo cyiciro giumba ibindi muri iri siganwa cya ’Full Marathon’.

Mu bagore uyu mwanya watwawe n’Umunyakenya Joan Kipyatich akoresheje amasaha abiri, iminota 33 n’amasegonda 27, akurikirwa n’Umunya-Éthiopie, Meseret Abebavehu warushijwe iminota itatu, mu gihe Florence Chepsoi Jepkosgei nawe wo muri Kenya yabaye uwa gatatu arushwa iminota itandatu n’uwa mbere.

Hari ku nshuro ya mbere Marathon Mpuzamahanga ya Kigali yitabiriwe n’abantu benshi kuko uyu mwaka yitabiriwe n’abakinnyi basaga 10 bari mu rwego rwa mbere rw’abakomeye ku Isi.

UMUSEKE.RW