Umusifuzi mpuzamahanga w’Umunyarwanda, Umutesi Alice, ari ku rutonde rw’abazasifura irushanwa ry’Igikombe cy’Isi cy’Abangavu batarengeje imyaka 17 kizabera muri Maroc.
Mu gihe habura amezi abiri ngo hatangire irushanwa ry’Igikombe cy’Isi cy’abangavu batarengeje imyaka 17, Ishyirahamwe ry’Umupira w’Amaguru ku Isi [FIFA], ryamaze gutangaza abasifura iri rushanwa.
Mu basifuzi 38 bo ku ruhande, harimo Umutesi Alice unaherutse mu Gikombe cya Afurika cy’abagore giherutse kubera muri Maroc.
Abandi bo ku Mugabane wa Afurika bazasifura iri rushanwa, ni Josephine Wanjiru wo muri Kenya, Yacine Samassa wo muri Maurtanie, Yara Atef wo mu Misiri, Tabara Mbodji wo muri Sénégal na Fides Bangurambona w’i Burundi.
Biteganyijwe ko iri rushanwa rizakinwa guhera tariki ya 17 Ukwakira kugeza ku ya 8 Ugushyingo 2025.
UMUSEKE.RW
