Uhagarariye Uganda i Kinshasa yatumijwe mu biro bya Minisitiri w’Ububanyi n’Amahanga ngo atange ibisobanuro ku ifungura ry’imipaka mu bice bigenzurwa na AFC/M23 bituranye n’igihugu cye.
Ku wa Kane tariki 17 Nyakanga, 2025 nibwo Amb.Alhajji Kaliisa Farid yitabye mu biro bya Minisitiri w’Ububanyi n’Amahanga, Thérèse Kayikwamba Wagner, baganira ku kibazo Congo ivuga ko giteye inkeke, cyo kuba Uganda yarafunguye imipaka mu bice bigenzurwa na AFC/M23.
Congo ibona ko icyemezo Uganda yafashe cyo gufungura iriya mipaka uwa Bunagana na Ishasha cyagombaga kuganirwaho.
Inama y’abaminisitiri iherutse gusaba ko Minisiteri y’Ububanyi n’Amahanga yazakurikirana iki kibazo, Congo igahabwa ibisobanuro.
Tariki 10 Nyakanga, 2025 inzego z’ibanze ku ruhande rwa Uganda zahuye n’izashyizweho na AFC/M23 zifungura imipaka irimo uwa Bunagana, icyo gihe abayobozi ba Uganda bavuze ko byasabwe na Perezida Yoweri Museveni.
Icyo cyemezo cyashimishije abaturage bavuze ko bagiye kurya ibyabo nta we ubahagaze hejuru.
Thérèse Kayikwamba Wagner, Minisitiri w’Ububanyi n’amahanga wa Congo ngo yagaragarije Ambasaderi wa Uganda impungenge igihugu cye cyagize, navuga ko Congo ifite uburenganzi bwo guharanira ubusugire bwayo, kandi ko ishaka ubufatanye n’ibihugu by’akarere ariko bushingiye ku bwubahane.
Uganda mu buryo bwanditse nta nyandiko irasohora ijyanye n’icyemezo cyayo cyo gufungura imipaka mu bice bigenzurwa na AFC/M23 ku ruhande rwa Congo. Iki cyemezo cyashimishije abayobozi ba AFC/M23, aho Perezida wa M23 Bertrand Bisimwa yashimiye Perezida Yoweri Museveni, ko icyemezo cye kigaragaza ubuyobozi bushishoza.
Kuva imirwano ya M23 yubuye mu mpera za 2021, umupaka wa Bunagana ni hamwe mu hafashwe mbere.
UMUSEKE.RW
