Umwongerezakazi Zoe Bäckstedt, n’Umunya-Suède Jakob Söderqvist begukanye umwanya wa mbere muri Shampiyona y’Isi y’Amagare mu gusiganwa n’ibihe, ITT, mu bakobwa n’abagabo batarengeje imyaka 23.
Jakob Söderqvist yakoresheje iminota 38.24, ku ntera y’ibilometero 31,2. Umwongereza Zoe Bäckstedt mu bagore yakoresheje iminota 30,56 ku ntera y’ibilometero 22,6.
Wari umunsi wa kabiri wa Shampiyona y’Isi y’Amagare iri kubera mu Mujyi wa Kigali bikaba ubwa mbere ibereye ku mugabane wa Afurika.
Ku munsi wa mbere hari hakinwe irushanwa ryo gusiganwa n’ibihe mu cyiciro cy’abagabo n’abagore bakuru ‘Elite Individual Time Trial’.
Umusuwisi Marlen Reusser, ni we wabaye uwa mbere mu cyiciro cy’abagore mu gusiganwa buri wese abarirwa ibihe bye (ITT) aho yakoresheje iminota 43 n’amasegonda icyenda.
Umubiligi Remco Evenepoel yabaye uwa mbere mu bagabo, akoresheje iminota 49 n’amasegonda 46 mu rugendo rw’ibilometero 40,6.
Ku munsi wa kabiri hari hatahiwe abatarengeje imyaka 23
Abakinnyi 50 bakomoka mu bihugu 36 ni bo bitabiriye uyu munsi wo gusiganwa n’ibihe, U-23 Individual Time Trial, ITT, mu cyiciro cy’abatarengeje imyaka 23 mu bagore, naho mu bagabo bari 61.
Abasiganwa bahagurukiye muri BK Arena, mbere yo kunyura Kimironko (Simba Supermarket) – Kwa Rwahama- Chez Lando – Prince House – Sonatube – Nyanza ya Kicukiro – Gahanga (ku Isoko)- Kugaruka Sonatube – Rwandex – Mu Kanogo – Mediheal- Kwa Mignone – Ku Muvunyi, bagasoreza imbere ya KCC.
Irushanwa nk’iri mu mwaka wa 2024 ryari ryabereye mu Mujyi wa Zürich, ryegukanwa n’Umudage Antonia Niedermaier.
Mu bagore nibwo bwa mbere, iki cyiciro cy’abatarengeje imyaka 23 cyari gikinwe.
Saa yine n’iminota 50 ni bwo Umunyarwandakazi Nyirarukundo Claudette w’imyaka 22 yatangiye isiganwa. Uyu yaje kugera kuri Kigali Convention Center akoresheje iminota 37.14 ku ntera y’ibilometero 22.6.
Saa sita n’iminota itanu nibwo Umwongereza Zoe Bäckstedt w’imyaka 20, yahagurutse muri BK Arena. Uyu yitwaye mu muhanda agenda ku muvuduko wa kilometero 44 ku isaha, ibyatumye yegukana Shampiyona y’Isi y’Amagare mu bakobwa batarengeje imyaka 23 basiganwa n’igihe, Individual Time Trial [ITT].
Ibyatumye akoresheje iminota 30:56 ku ntera y’ibilometero 22,6.
Viktoria Chladoñova wo muri Slovakia yarushijwe umunota umwe n’masegonda 50, mu gihe Umutaliyani Federica Venturelli yabaye uwa gatatu, arushwa iminota ibirin’amasegonda11 n’uwa mbere.
Ni isiganwa ritarangijwe n’abakinnyi bose kuko babiri batageze ku murongo usoza.
Umunyarwandakazi Ntakirutimana Martha, yasoje ari ku mwanya wa 27 aho yarushijwe n’uwa mbere iminota itanu n’amasegonda 31.
Abakobwa basoje, abahungu batarengeje imyaka 23 ni bo bakurikiyeho
Saa saba n’iminota 50, nibwo Umunyarwanda Tuyizere Etienne yabimburiye abandi, bagombaga kwitwara mu ntera y’ibilometero 31.2.
Yageze kuri Kigali Convention Center, akoresheje iminota 43 n’masegonda 36, mu rugendo rw’ibilometero 31.2. Impuzandengo y’umuvuduko yariho ni 42,9 Km/h.
Abakinnyi icumi bamukurikiye barinze bagera ku murongo akiri imbere yabo mu gukoresha ibihe bito, ndetse aguma yicaye mu ntebe iba yaragenewe uwakoresheje ibihe bito.
Yaje kuyikurwamo n’Umushinwa Li You.
Umunyarwanda wa kabiri wakinnye isiganwa ryo kuri uyu wa Mbere mu bahungu batarengeje imyaka 23, Niyonkuru Samuel, yahagurutse muri BK Arena saa 14:50.
Umunya-Suede, Jakob Söderqvist, ni we mukinnyi wa nyuma wasohotse muri BK Arena saa Cyenda n’iminota 50. Uyi yari yitezwe cyane kuko yari yaregukanye umwanya wa kabiri mu 2024.
Yaje kubihamya aba uwa mbere yegukana umudali wa Zahabu i Kigali nyuma yo gukoresha iminota 38 n’amasegonda 24 ku ntera y’ibilometero 31,2 muri Individual Time Trial y’abahungu batarengeje imyaka 23.
Jakob yarushije Umunya’Australia Nate Pingle wabaye uwa kabiri umunota n’amasegonda atatu.
Maxime Decomble ukomoka mu Bufaransa we aba uwa 3 aho yasizwe umunota umwe n’amasegonda 4.
Umunyarwanda wasoreje hafi ni Niyonkuru Samuel, aho yasoreje ku mwanya wa 29 yasizwe iminota ine n’amasegonda na Jakob Söderqvist wabaye uwa mbere.
Undi munyarwanda Tuyizere Etienne yabaye uwa 31 yasizwe iminota itanu n’amasegonda 12.
Shampiyona y’Isi y’Amagare izakomeza ku wa Kabiri, aho abato batarengeje imyaka 19 bazaba basiganwa n’ibihe ku giti cyabo ‘Junior Individual Time Trial’ mu bahungu n’abakobwa.
Abangavu bazasiganwa intera ya kilometero 18.3 kuva saa yine n’iminota 45, ingimbi zo bazasiganwa intera ya kilometero 22.6 kuva saa munani z’umugoroba.
MUGIRANEZA Thierry/ UMUSEKE.RW
