Minisitiri w’Ubutegetsi bw’igihugu, Habimana Dominique yatangaje ko hari gahunda yo kwandikisha Umuganura ku rutonde rw’umurage w’Isi binyuze mu Ishami ry’Umuryango w’Abibumbye rishinzwe Uburezi, Ubumenyi n’Umuco, (UNESCO).
Yabivuze kuru uyu wa Gatanu, tariki ya 1 Kanama 2025, ubwo mu Karere ka Musanze mu Ntara y’Amajyaruguru haberaga ibirori byo kwizihiza umunsi w’Umuganura ku rwego rw’Igihugu.
Buri wa Gatanu wa mbere wa Kanama, Abanyarwanda bazirikana uyu munsi ubumbatiye ubumwe, gukunda umurimo no gukunda Igihugu.
Minisitiri w’Ubutegetsi bw’Igihugu, Habimana Dominique, yabwiye abaturage ko Umuganura atari ugusangira gusa ko ahubwo ari igikorwa cy’umwaka wose urimo inzira ndende yo guhiga, gutegura ibizakoreshwa birimo imbuto, ingengo y’imari, bikurikirwa no gutangira ibikorwa no kuzasarura umusururo wabivuyemo.
Ati “Mu muco w’Abanyarwanda cyaraziraga kuganura wenyine, utaganuje abandi. Umuturanyi yagabiranaga na mugenzi we, abejeje bagasangira n’abarumbije. Umuganura utwibutsa rero ko ubumwe ari inkingi y’iterambere, umuturanyi atari uwo kurebera ahubwo ari uwo gufatanya na we kuko iyo Abanyarwanda bafatanyije nta kibananira.
Indangagaciro z’ubumwe bwacu zubakiwe ku gufatana urunana, kwirinda ivangura n’amacakubiri, gusabana, kwihanganirana no gutabarana, kumenya ko turi bamwe ari yo Ndi Umunyarwanda.”
Yabwiye abaturage ko muri iki gihe Umuganura wizihizwa hishimirwa umusaruro uturuka muri Serivisi, ikoranabuhanga, uburezi, ubukerarugendo, ubuhanzi, inganda n’ibindi.
Ati “Kwizihiza Umuganura, ni umwanya wo gushima ibyo twagezeho, gufata ingamba zo kurushaho gukora, kongera kwiyemeza gusigasira umuco wacu no kubaka ubumwe buhamye hagati y’Abanyarwanda.
Ni uguhamya ko dukomoka hamwe, dusangiye umurage umwe kandi twubakiye ku nkingi zimwe. Bamwe batekereza ko umuganura ari ugusangira gusa, umuganura ni igikorwa cy’umwaka wose, kigizwe n’inzira ndende yo guhiga, bisobanuye gutegura ibizakoreshwa. ”
Minisitiri Habimana yavuze ko ubu u Rwanda ruri kureba uko Umuganura washyirwa ku rutonde rw’umurage w’Isi binyuze muri UNESCO,Ishami ry’Umuryango w’Abibumbye rishinzwe Uburezi, Ubumenyi n’Umuco, kuko mu minsi yose mikuru yizihizwa mu Rwanda ari wo munsi mukuru gakondo ukomoka mu Rwanda.
Ati “Niyo mpamvu Leta y’u Rwanda yawusubijeho kuva mu 2011 ndetse turi no mu nzira zo kuwandikisha ku rutonde rw’umurage w’Isi wa UNESCO.”
Ku rutonde rw’umurage w’Isi wa UNESCO, u Rwanda rusanganyweho inzibutso 4 za Jenoside yakorewe Abatutsi, izi nzibutso zikaba ari rwa Jenoside rwa Kigali ruri ku Gisozi, urwa Bisesero, urwa Murambi n’urwa Nyamata.
Hariho kandi Pariki y’igihugu ya Nyungwe ndetse n’Intore z’u Rwanda.
Mu kwizihiza Umuganura i Musanze, habaye ubusabane ndetse abaturage bahabwa imbuto yo guhinga, imiryango itanu ihabwa inka.
MUGIRANEZA Thierry
UMUSEKE.RW i Musanze
