U Burundi bwatangiye kumvana imitsi n’u Bubiligi

Ubutegetsi bw’u Burundi n’ubw’u Bubiligi bwinjiye mu mwuka wa politiki urimo kutumvikana bitewe n’uko u Burundi bwirukanye David Leyssens wari Umuyobozi w’Ikigo cy’u Bubiligi gishinzwe gushyigikira Imishinga y’Iterambere mu bihugu bikennye (Enabel).

Uyu ngo azira ko yakoresheje urubuga nkoranyambaga rwa LinkedIn ashyiraho ifoto ikozwe mu buryo bw’igishushanyo (caricature) cy’ikinyamakuru The Continent, cyakoze kigaragaza uburyo ibikomoka kuri Peteroli byabaye ingume mu Burundi.

Ibi ntibyashimishije ubutegetsi bwa Gitega, maze Minisiteri y’Ububanyi n’Amahanga itegeka David Leyssens wayoboraga Enabel kuva mu Burundi bitarenze tariki ya 6 Nzeri 2025.

Minisiteri y’Ububanyi n’amahanga y’u Bubiligi, yavuze ko ibabajwe n’umwanzuro w’u Burundi wo kwirukana uhagarariye iki Kigo gishinzwe gushyigikira Imishinga y’Iterambere mu bihugu bibikennye.

Yagize iti “Iki ni icyemezo gishingiye ku bintu bwite byatangajwe hanze y’inshingano afite zizwi.”

Ibinyamakuru by’imbere mu Bubiligi bivuga ko Minisitiri w’ububanyi n’Amahanga, Maxime Prévot, yatangaje ko bifuza kuganira vuba ku hazaza ha Enabel mu Burundi.

Iyi isanzwe ifite imishinga ya miliyoni 120 z’Amayero yo guteza imbere Abarundi mu myaka itanu iri imbere.

U Burundi n’u Bubiligi byari mu kwezi kwa buki dore ko Maxime Prévot yaherukaga kugenderera iki Gihugu kiri mu Majyepfo y’u Rwanda, akaganira na Perezida Varisito Ndayishimiye.

Icyo gihe baganiriye ku ntambara yo mu Burasirazuba bwa Repubulika Iharanira Demokarasi ya Congo ‘ibihugu byombi biri ku ruhande rumwe rwo kurwanya M23’.

MUGIRANEZA THIERRY/ UMUSEKE.RW