Perezida w’u Burusiya Vladimir Putin na Perezida wa Korea y’Amajyaruguru, Kim Jong Un, ni bamwe bu bayobozi 25 bitabiriye akarasisi gakomeye ka gisirikare mu Bushinwa, kateguwe hizihizwa imyaka 80 iki Gihugu kishimira itsinzi cyakuye mu Ntambara ya Kabiri y’Isi.
Ni ibirori byabereye mu murwa Mukuru Beijing mu mbuga ya Tiananmen, bitangira saa tatu za mu gitondo kuri uyu wa Gatatu mu Bushinwa bikaba ari saa saba z’ijoro ku isaha ngengamasaha ya GMT.
Imbere y’Abategetsi 25, muri aka karasisi u Bushinwa bwerekanye uburyo bwubatse igisirikare gikomeye.
Mu bitabiriye barimo Perezida w’u Burusiya Vladimir Putin na Perezida wa Korea y’Amajyaruguru, Kim Jong Un wari kumwe n’umukobwa we Kim Ju Ae, nk’abashyitsi b’imena.
Umutegetsi wo muri Korea ya Ruguru waherukaga kwitabira akarasisi nk’aka mu Bushinwa ni Kim Il Sung mu 1959.
Abandi bayobozi bitabiriye barimo Perezida wa Iran Masoud Pezeshkian, Minisitiri w’Intebe wa Pakistan Shehbaz Sharif, Perezida wa Mongolia Khurelsukh Ukhnaa, Perezida wa Belarus Alexander Lukashenko, Perezida wa Uzbekistani Shavkat Mirziyoyev, Perezida wa Vietnam Luong Cuong, Minisitiri w’Intebe wa Malesia Anwar Ibrahim, Perezida wa Maldivi Mohamed Muizzu, Minisitiri w’Intebe wa Nepali KP Sharma Oli, Perezida wa Zimbabwe Emmerson Mnangagwa, ndetse na Perezida wa Indonesia Prabowo Subianto.
Minisitiri w’Intebe wa Slovakia Robert Fico na Perezida wa Serbia Aleksandar Vucic, ni bo Banyaburayi bonyine bitabiriye aka karasisi.
Perezida Xi Jinping, wari waserutse mu mwenda wambarwaga na Mao Zedong ufatwa nk’uwahinduye u Bushinwa Igihugu gikomeye mu mahanga, yatambagiye mu ngabo ibihumbi zari mu mbuga ngari ya Tiananmen.
Herekanwe intwaro zikomeye u Bushinwa bumaze kugeraho zirimo izo mu bwoko bwa ‘nuclear triad’, izi zikaba misire ziterwa ku butaka, mu nyanja no mu kirere icyarimwe.
Muri zo harimo Jinglei-1, misile ndende yoherezwa mu kirere, Julang-3 misile yoherezwa mu mazi ndetse na Dongfeng-31 na Dongfeng-61, misile zamubikiranya imigabane.
Perezida Xi kandi yatambagiye mu mirongo yariho misile zizwi nka ‘hypersonic’ zifite ubushobozi bwo kugaba ibitero simusiga ku mato manini.
Hanerekanwe kandi ‘drones’ zishobora kugaba ibitero mu mazi mu kirere, kajugujugu zidafite abapilote zagenewe kubaga ibitero mu nyanja.
Mu ijambo rye, Perezida Xi yavuze ko Isi ihanganye no guhitamo hagati y’amahoro n’intambara, ibiganiro n’amakimbirane, intsinzi ku mpande zombi cyangwa inyungu imwe gusa.
Ati “Abashinwa bahagaze ku ruhande rukwiye rw’amateka.”
Perezida wa Leta zunze Ubumwe za Amerika, Donald Trump, yanditse ku mbuga nkoranyambaga ko Perezida Xi w’u Bushinwa yahurije hamwe Perezida w’u Burusiya Vladimir Putin na Perezida wa Koreya y’Amajyaruguru, Kim Jong Un mu mugambi wo kurwanya Amerika.
MUGIRANEZA THIERRY/ UMUSEKE.RW
