Senderi Hit yatanze ibyishimo ku batari bake bitabiriye ibirori byo Kwita Izina ku nshuro ya 20, byitabiriwe n’abarimo Minisitiri w’Intebe, Madamu Jeannette Kagame n’abandi banyacyubahiro.
Ibirori byo Kwita Izina by’abana b’ingagi 40 byabaye ku wa Gatanu, tariki ya 5 Nzeri 2025, mu Kinigi mu Karere ka Musanze.
Minisitiri w’Intebe, Dr. Justin Nsengiyumva, ni we wari umushyitsi mukuru muri ibi birori bimaze kubaka izina ku rwego mpuzamahanga.
Imbere y’abasaga ibihumbi 10 baturutse hirya no hino ku isi, Senderi Hit yongeye kwerekana ko ari umuhanzi udashidikanywaho.
Abo barimo Professor Senait Fisseha, Sang-Hyup Kim, David Marriot, Dr. Yin Ye, Umuhanzikazi Yemi Alade n’abandi baturutse hirya no hino ku isi.
Senderi Hit, mu ndirimbo ze zirimo ‘Tuzarwubaka’, ‘Twaribohoye’,’ Ibidakwiriye’ n’izindi, yafashije abari mu Kinigi gususuruka.
Uyu muhanzi uhorana udushya yafashe umwanya ashimira buri wese waje muri ibi birori, by’umwihariko abakunzi be badahwema kumwereka urukundo.
Abakunzi be babonye avuye ku rubyiniro batangiye kuririmba indirimbo ze zitandukanye, “hari n’abagize ngo aragaruka,” amaso yabo ahera mu kirere.
Muri iki gitaramo haririmbyemo n’abandi bahanzi bakomeye mu Rwanda nka Bruce Melodie, Ariel Wayz n’Itorero rya Mashirika.
Minisitiri w’Intebe Dr. Nsengiyumva Justin yashimiye abaturage bo mu Karere ka Musanze n’abaturutse hirya no hino mu gihugu ku bufatanye mu kurengera ibidukikije n’ingagi.
Yagize ati: “Umuhango wo Kwita Izina abana b’Ingagi ni umwanya mwiza wo kongera gushimira abaturage bose baturiye Pariki z’Igihugu ku ruhare bagira mu kubungabunga ibidukikije.”
NDEKEZI JOHNSON / UMUSEKE.RW
