Urwego rutegura Shampiyona y’Icyiciro cya Mbere mu Rwanda [Rwanda Premier League], rwatangiye gusura amakipe akina iyi shampiyona hagamijwe kuyahugura ku mategeko mashya y’umupira w’amaguru.
Mu gihe habura iminsi ibarirwa ku ntoki ngo shampiyona 2025/2026 itangire, inzego bireba zirimo Rwanda Premier League ndetse n’Ishyirahamwe ry’Umupira w’Amaguru mu Rwanda, Ferwafa, zikomeje kwegera amakipe hagamijwe kugira ibinozwa kugira ngo amarushanwa y’uyu mwaka azagende neza.
Ku wa Mbere, tariki ya 8 Nzeri 2025, Rwanda Premier League ifatanyije na Ferwafa, hatangijwe igikorwa cyo kuganira n’amakipe azakina Shampiyona y’Icyiciro cya Mbere 2025/2026, hagamijwe kurebera hamwe amategeko n’amabwiriza ayigenga, Imyitwarire y’abazayikina hagamijwe kunoza ireme ry’irushanwa ndetse n’amategeko mashya y’umupira w’amaguru.
Abanyamuryango bahereweho, ni abo mu Majyepfo barimo AS Muhanga, Mukura VS n’Amagaju FC.
Biteganyijwe ko kuri uyu wa Kabiri, hasurwa Musanze FC yo mu Majyaruguru, Marines FC, Etincelles FC na Rutsiro FC zose zo mu Burengerazuba bw’u Rwanda.
Ejo ku wa Gatatu, tariki ya 10 Nzeri 2025, biteganyijwe ko amakipe yo mu Mujyi wa Kigali ari yo azasurwa. Aya arimo Rayon Sports, Kiyovu Sports, APR FC, AS Kigali, Gicumbi FC [isigaye yakirira i Kigali], Police FC, Gasogi United, Gorilla FC na Bugesera FC izaba iri i Kigali.
Ni gahunda yashyizweho, kugira ngo bafashe abakinnyi n’abandi bayobozi batandukanye, kumenya no gusobanukirwa amategeko mashya agenga umupira w’amaguru ku Isi, kugira ngo imikorere n’imikoranire y’impande zose bireba izakomeze igende neza ndetse barusheho kubaka ireme rya shampiyona.
Biteganyijwe ko shampiyona y’icyiciro cya mbere mu Bagabo, izatangira ku wa Gatanu, tariki ya 12 Nzeri 2025. Ikipe ya Gorilla FC izaba yakiriye AS Muhanga kuri Kigali Pelé Stadium Saa Cyenda z’amanywa.
UMUSEKE.RW
mwiriweneza muduhe amakuru ya reyon murakoze