Itsinda ry’abayobozi n’abatekinisiye b’Akarere ka Rusizi rivuga ko ryifuza kunoza politiki y’imiturire bagendeye kuri site babonye i Muhanga.
Urugendo shuri rurangajwe imbere n’Umuyobozi wungirije ushinzwe Iterambere ry’Ubukungu mu Karere ka Rusizi, bamwe mu bagize Inama Njyanama n’abatekinisiye muri serivisi y’Ubutaka.
Iri tsinda rikigera i Muhanga, ryabanje gusobanurirwa ibyiza byo gutunganya site z’imiturire, ndetse n’imbogamizi zirimo.
Umuyobozi wungurije ushinzwe Iterambere ry’Ubukungu mu Karere ka Muhanga Bizimana Eric, avuga ko mu ishyirwa mu bikorwa ry’igishushanyombonera atari ikintu cyari cyoroshye icyo gihe.
Ati: ”Icyagombaga kwitabwaho ni uguhuza ibikubiye mu gishushanyombonera cy’Umujyi wa Muhanga n’Ingengo y’Imali Akarere kari gafite.”
Bizimana avuga ko amikoro yo kubona amafaranga y’ingurane baha abaturage bafite imitungo ahagenewe site z’Imiturire no kuhashyira ibikorwaremezo bitari korohera Ubuyobozi bw’Akarere.
Ati: ”Twagize amahirwe kubera ko Ikigo cy’Ubutaka cyateganyije site z’Imiturire, izo site zagombaga guhita zitunganywa dutangira kubishyira mu bikorwa.”
Visi Meya Bizimana avuga ko site zigera ku icyenda zatangiye gutunganywa kandi nta Ngengo y’Imali Akarere gashoyemo usibye kwigisha abazituyemo no kuzamura imyumvire yabo bakemera kwigomwa ubutaka bwabo ku kigero cya 23% kugira ngo hashyirwe imihanda ndetse agatanga n’amafaranga 250000Frws yo gutunganya site amafaranga atanga mu byiciro.
Kamanzi Eric Joy wahawe isoko ryo gutunganya site ya Nyarutovu-Nyarusiza avuga ko bahereye mu guhanga imihanda mishya no gutunganya iyari isanzwe.
Ati:”Byafashe igihe kugira ngo abaturage bumve akamaro ko gutunganya site z’imiturire, ariko baje kubyumva ubu iyi site yarangije gutunganywa.”
Kamanzi yabwiye UMUSEKE ko bagitangira gushyira mu bikorwa igishushanyombonera cy’Umujyi wa Muhanga, mu mwaka wa 2022-2023 ikibanza cyaguraga miliyoni ebyeri, aho site zitunganyirijwe ikibanza muri ako gace kikaba kimaze kwikuba kane.
Visi Meya ushinzwe Iterambere mu Karere ka Rusizi, Habimana Alfred avuga ko baje kureba uko Muhanga yabigenje kugira ngo bice intege imyubakire yo mu kajagari no guha agaciro ubutaka bw’abaturage.
Ati: ”Tugiye gutunganya site za Murangi, i Gihundwe ahitwa Shagasha, Gatsiro ugana za Nkaka aho hose hazatunganywa.”
Habimana avuga ko bateganya no kunoza politiki y’imiturire mu Mujyi wa Kamembe kuko hakiri akajagari.
Gusa iri tsinda ryaturutse i Rusizi rivuga ko ibiganiro n’abaturage batuye ahateganywa gutunganywa ari byo bashyize imbere.
Site 9 Akarere ka Muhanga katangiye gutunganya harimo iya Nyarutovu – Nyarusiza, Site ya Karama, Murambi, Gasharu, Kavumu, Kinini, Kamazuru na Kanyanza, site ziherereye mu Murenge wa Nyamabuye, Shyogwe na Cyeza.
MUHIZI ELISÉE
UMUSEKE.RW/Muhanga.
