Singida Black Stars yavuye i Kigali yemye

Igitego cya Marouf Tchakei cyatsinzwe ku munota wa 22 w’umukino, cyafashije ikipe ya Singida Black Stars yo muri Tanzania gutsinda Rayon Sports igitego 1-0, mu mukino iyi kipe yambara ubururu n’umweru yavunikishijemo rutahizamu wa yo, Asman Ndikumana.

Ni mu mukino w’ijonjora ry’ibanze mu mikino ya CAF Confederation Cup, wabaye kuri uyu wa Gatandatu, tariki ya 20 Nzeri 2025 Moya z’ijoro kuri Kigali Pelé Stadium.

Umutoza wa Gikundiro, Afhamia Lotfi utari ufite abakinnyi ngenderwaho barimo Bayisenge Emery na Bigirimana Abedi, yari yahisemo kubanza mu kibuga abakinnyi barimo: Pavel Ndzila Serumogo Ali, Nshimiyimana Emmanuel, Ndayishimiye Richard, Habimana Yves, Asman Ndikumana, Adama Bagayogo, Niyonzima Olivier Seifu, Rushema Chriss,Tambwe Gloire na Nshimiyimana Fabrice.

Kigali Pelé Stadium yari yuzuye abakunzi ba Rayon Sports, bari bafite icyizere ko ikipe bihebeye ibona impamba izayijyana i Dar es Salaam mu mpera z’icyumweru gitaha.

Miguel Gamondi wa Singida Black Stars, yari yabanje mu kibuga abakinnyi barimo: Obasogie Amas, Nickson Clement, Khalid Aucho, Emmanuel Keyekeh, Khalid Habibu, Horso Muaku Malanga, Marouf Tchakei, Chukwu Morice, Anthony Tra, Clatous Chama na Koffi Ande.

Saa Moya n’umunota umwe ku isaha ya Kigali, ni bwo abasifuzi bakomoka mu Bwami bwa Eswatin batangije umukino, maze Nshimiyimana Emmanuel wa Rayon Sports umupira ahita awuzamura imbere ashaka Habimana Yves ariko birangira urenze.

Mu minota itanu ya mbere, Singida Black Stars yari yatangiye kwerekana ibimenyetso ko atari agafu k’imvugwa rimwe kuko ku munota wa gatatu gusa yari yabonye koroneri itagize icyo ibyara.

Murera yari imbere y’bafana ba yo, na yo binyuze mu busatirizi bwa yo bwari buyobowe na Asman Ndikumana wari umaze gutsinda ibitego bine kuva atangiye kwambara ubururu n’umweru, yanyuzagamo igasatira.

Ku munota wa 18 w’umukino, Adama Bagayogo yateye umupira ku ikosa  hasi ariko ba myugariro ba Singida barazibira.

Ingoma z’abafana ba Rayon Sports zacwejwe ku munota wa 22 ubwo Singida Black Stars yatsindaga igitego cya mbere gitsinzwe na Marouf Tchakei akoresheje umutwe.

Ni umupira uteretse wari utewe neza na Clatous Chota Chama.

Igice cya mbere kirangira Singida Black Stars iyoboye n’igitego 1-0.

Igice cya kabiri cy’umukino cyatangiranye n’impinduka ku ruhande rwa Rayon Sports, aho Adama Bagayogo yasohotse maze asimburwa na Azziz Bassane wasabwaga kwihutisha igana imbere n’ubwo uyu munsi utari mwiza ku ba-Rayons.

Iyi mpinduka yatumye Rayon Sport itangira kunyuza imipira ku mpande, ibyatumaga abakinnyi ba Singida batangira gukora amakosa, nko ku munota wa 55, Clatous Chama yeretswe ikarita y’umuhondo kubera gutinza umukino.

Ku munota wa 60, Rayon Sports yashakaga igitego yabonye kufura iterwa na Ndayishimiye Richard, wayuteye mu maguru ya ba myugariro ba Singida.

Afhamia Lotfi utari wanyuzwe n’ubusatirizi bwe yakoze indi mpinduka, mu kibuga havamo Habimana Yves hajyamo Toni Kitoga.

Ku munota wa 65, Murera yabuze amahirwe yo gutsinda igitego ubwo Tambwe yahinduraga umupira ashaka Ndikumana, wanyereye akawubura.

Singida Black Stars yari yahisemo gukina imipira miremire, yabuze igitego ku munota wa 68 ubwo Clatous Chama yananirwaga gutsinda igitego ku mupira wari wananiwe gukurwaho na Nshimiyimana Fabrice.

Iminota 15 y’umukino yaranzwe no gushwana kw’abakinnyi nko ku munota wa 78 Khalid Aucho yakubise hasi Aziz Bassane mu kibuga hagati, abakinnyi b’impande zombi batangira gushyamirana.

Ibi byatumye uyu Mugande wari uyoboye abakinnyi ba Singida yerekwa ikarita y’umuhondo.

Rutahizamu wa Singida Horso Muaku Malanga, ku munota wa 85 yahawe ikarita y’umuhondo kubera gutinda kuva mu kibuga.

Abafana ba Rayon Sports batangiye gusohoka muri Stade.

Ku munota wa 88, Rayon Sports yabonye umupira uteretse ku ikosa ryari rikorewe Serumogo Alli. Uyu watewe na Kitoga ariko ujya muri koroneri.

Ku munota wa 92 w’umukino, rutahizamu wa Rayon Sports, Asman Ndikumana yagiriye ikibazo mu kibuga nyuma yo kugongana n’abakinnyi ba Singida.

Byabaye ngombwa ko imbangukiragutabara yinjira mu kibuga ngo ahabwe ubutabazi bwisumbuyeho, ndetse birangira ahise ajyanwa kwa muganga.

Iminota 90 isanzwe y’umukino n’indi itanu y’inyongera yarangiye ikipe ya Singida Black Stars itsinze igitego 1-0.

Rayon Sports ifite akazi gakomeye muri Tanzania mu mpera z’icyumweru kugira ngo ikomeje mu kindi Cyiciro cya CAF Confederation Cup.

MUGIRANEZA Thierry/ UMUSEKE.RW