Ikipe ya Rayon Sports WFC ihagarariye u Rwanda mu mikino ya Caf Women’s Champions League Cecafa Qualifiers iri kubera muri Kenya mu Mujyi wa Nairobi, yatsinze Kampala Queens yo muri Uganda penaliti 4-3 ihita iyisezerera muri ½ cy’iri rushanwa.
Ku manywa yo kuri iki cyumweru, tariki ya 14 Nzeri 2025, ni bwo habaye imikino ya ½ mu irushanwa rya Cecafa y’abagore [Caf Women’s Champions League Cecafa Qualifiers 2025]. Iki cyiciro cyasize gitanze amakipe abiri azahurira ku mukino wa nyuma.
Rayon Sports WFC yari ihanzwe amaso n’Abanyarwanda benshi bitewe n’uko ari yo ibahagarariye muri iri rushanwa, yasezereye Kampala Queens nyuma yo kuyitsinda penaliti 4-3 nyuma y’uko amakipe yombi yari yanganyije 0-0 mu minota 120.
Gikundiro yatsindiwe penaliti na Gikundiro Scholastique, Emeryne, Ukwinkunda Jeannette na Umwariwase Dudja.
Iyi kipe yo mu Nzove izahura na JKT Queens yo muri Tanzania na yo yasezereye Kenya Police Bullets kuri penaliti 4-2 nyuma y’uko amakipe yombi yari yanganyije igitego 1-1 mu minota 120.
Aba bakobwa bahagarariye u Rwanda, bageze ku mukino wa nyuma barabanje guca mu mikino y’amatsinda maze basezerera CBE FC yo muri Éthiopie batsinze igitego 1-0 na Top Girls Academy y’i Burundi banganyije 0-0.
Biteganyijwe ko umukino wa nyuma uzaba ku wa Kabiri, tariki ya 16 Nzeri 2025. Nyuma yo kwitwara neza bagakora amateka yo kugera ku mukino wa nyuma wa Cecafa, Rayon Sports WFC yahise ihabwa na Ferwafa 5,000,000 Frw y’agahimbazamusyi mu gihe kandi iri shyirahamwe ryabemebereye ayisumbuyeho mu gihe baba babashije kwegukana igikombe.
Ikipe izegukana igikombe hagati ya Murer ana JKT Queens, ni yo izahita ikatisha itike yo kuzakina amarushanwa ya Caf Women’s Champions League, ihagarariye Akarere ka Cecafa.
UMUSEKE.RW
