Myugariro wo hagati, Buregeya Prince wakiniraga AS Kigali, yerekeje muri Nairobi United FC ikina muri shampiyona ya Kenya.
Uyu musore w’imyaka 25, amakuru ava muri Kenya avuga ko yamaze kugera mu Mujyi wa Nairobi ndetse yamaze no gushyira umukono ku masezerano y’imyaka ibiri muri iyi kipe.
Bivugwa ko Nairobi United FC, yahaye Buregeya angana n’ibihumbi 50$ ku masezerano azageza mu 2027. Iyi kipe izakina amarushanwa ya CAF Confederation Cup nyuma yo kwegukana igikombe cy’Igihugu 2024/2025 itsinze Gor Mahia ibitego 2-1 ku mukino wa nyuma.
Prince yazamukiye mu makipe y’abato ya APR FC, akinira ikipe nkuru y’Ingabo mu gihe cy’imyaka irindwi mbere yo kuhava ajya muri AS Kigali yari amazemo umwaka umwe.
Mu ijonjora rya mbere ry’ibanze rya CAF Confederation Cup, Nairobi United FC izahura na NEC FC yo muri Uganda tariki ya 20 Nzeri 2025.
UMUSEKE.RW
