Ubuyobozi bw’Akarere ka Kamonyi bwageneye ishimwe Umurenge, Akagari n’Umudugudu byahize abandi mu mihigo y’umwaka ushize wa 2024-2025.
Umurenge wa Gacurabwenge, niwo wahize indi Mirenge 11 igize Akarere ka Kamonyi mu nkingi y’Ubukungu, Imibereho myiza n’Imiyoborere.
Ubuyobozi bw’Akarere kandi bwavuze ko ku mwanya wa Kabiri haza Umurenge wa Runda, ugakurikirwa n’Umurenge wa Kayenzi.
Akarere kahembye Akagari ka Gihinga, Gishyeshye, ndetse n’Akagari ka Mataba. Ni Utugari twahize utundi Tugari 56 dusigaye kuko Akarere gafite Utugari 59 twose hamwe.
Ubuyobozi bw’Akarere bwahaye igikombe Umudugudu wa Rubumba, Karama na Nyenyeri, Imidugudu yaje ku isonga inahiga indi 314 isigaye kuko yose hamwe ari Imidugudu 317.
Umunyamabanga Nshingwabikorwa w’Umurenge wa Gacurabwenge, Umugiraneza Martha avuga ko bari bafite imihigo 98 bafatanyije n’abaturage ndetse n’abafatanyabikorwa mu kuyesa.
Gitifu Umugiraneza avuga ko usibye iyo mihigo besheje bafatanyije, hari indi mihigo yihariye Akarere kari kahize bashyize mu bikorwa nk’Umurenge Akarere kabaha amanota yayo.
Ati: ”Twesheje umuhigo wa EJO HEZA, Inguzanyo ya VUP twahaye abaturage, n’Umuhigo bise uwabyikorere urebana na Serivisi za Irembo.”
Gitifu avuga ko ubu bufatanye no kugisha Akarere inama aribyo byatumye besa imihigo ku kigero cyiza.
Umukuru w’Umudugudu wa Rubumba mu Murenge wa Runda, avuga ko umuhigo wo kubaka umuhanda wa Kaburimbo bigizwemo uruhare n’abaturage ari wo wazamuye amanota y’imihigo.
Ati: ”Uwo muhanda wa Kaburimbo abaturage bubatse twawise Ubumwe Road, kandi ufite uburebure bwa metero zirenga 600, uwo muhigo uracyakomeza.”
Meya w’Akarere ka Kamonyi, Dr Nahayo Sylvère avuga ko mu marushanwa buri wese aba yifuza kuza ku mwanya wa mbere, akavuga ko abaje ku myanya ya nyuma batagomba gucika intege ahubwo ko ibi bigomba kubatera ishyaka ryo gukora neza, kugira ngo mu mihigo y’Umwaka utaha batangiye gushyira mu bikorwa bazabashe kuyesa nta birantega bahuye na yo.
Ati: ”Turashimira imirenge, utugari n’imidugudu yaje ku isonga, twifuza ko yabera urugero rwiza abandi batabashije kugera kuri uru rwego.”
Umurenge wa Gacurabwenge wahize indi mu Mihigo, wabonye amanota 91,7% uhabwa igikombe, icyemezo cy’ishimwe na Frw 500, 000.
MUHIZI ELISÉE
UMUSEKE.RW/Kamonyi.
