Aborozi bo mu Karere ka Kamonyi biyemeje kongera umubare w’amatungo afite ubwishingizi, umuhigo bafashe mu nama bahuriyemo n’Ubuyobozi bw’Akarere, inzego z’ubuhinzi n’ubworozi ndetse n’ibigo by’ubwishingizi.
Babigarutseho bashingiye ku mubare w’inka zisaga 49,000 zo mu Karere, aho izigera ku 3,000 ari zo zimaze gushyirwa mu bwishingizi.
Aborozi bavuga ko uyu mwaka bazongera inka mu bwishingizi zikava ku 3,000 zikagera ku 7,500.
Nyiranshimimana Bernadette wo mu Murenge wa Runda avuga ko kongera umubare w’inka mu bwishingizi byoroshye kuko ikiguzi ari gito ugereranyije n’agaciro k’inka.
Ati:“Nashyize Inka zanjye mu bwishingizi muri uyu mwaka nagize ibyago ifatwa n’uburwayi irimo kubyara, Umuvuzi w’amatungo wo muri Sosiyete nafatiyemo ubwishingizi angira Inama yo kuyigurisha bangurira indi”
Uyu mworozi avuga ko gushyira mu bwishingizi amatungo bisaba imyumvire kuko hari ababyicuza bamaze gupfusha Inka.
Umuyobozi ushinzwe ibikorwa mu Kigo gishinzwe gutanga Serivisi mu buhinzi n’ubworozi(Dedicated Agri Services Ltd), Niyonshuti Lambert avuga ko muri serivisi nyinshi batanga harimo n’iyo gufasha umubare w’abafata Ubwishingizi butandukanye.
Ati:“Twaje gufasha aborozi, abavuzi b’amatungo ndetse n’ibigo by’ubwishingizi kuzamura imibare kuzamura ibipimo by’amatungo akeneye gushyirwa mu bwishingizi”.
Avuga ko kuzamura umubare w’amatungo agomba gushyirwa mu bwishingizi bigomba kujyana no kongera bumenyi ndetse no kwegereza aborozi abakangurambaga muri buri Mudugudu.
Ati:“Iyo tuganira n’aborozi batubwira ko bafite icyizere gicye cyo gushyira amatungo yabo ubwishingizi kuko baba bashidikanya ko batazishyurwa, icyizere kizaza bitewe n’ubumenyi bagenda bahabwa”.
Niyongira Uzziel, Umuyobozi wungirije ushinzwe Iterambere ry’Ubukungu mu Karere ka Kamonyi, agaragaza ko hakenewe kuzamura imyumvire y’aborozi ku kamaro k’ubwishingizi kugira ngo birinde ibihombo.
Ati:“Twifuza ko aborozi babijyamo babishaka kandi bazi neza akamaro bibafitiye bahereye ku bahuye n’igihombo bitewe no kudashyira mu bwishingizi amatungo yabo ndetse n’ibihingwa”.
Visi Meya Niyongira avuga ko hamwe n’ubukangurambaga batangiye bizera ko umubare w’Inka 3500 ziri mu mihigo bazawurenza bitewe n’imbaraga zashyizwemo.
Usibye umubare w’Inka 3000 zimaze gushyirwa mu bwishingizi, hari Ingurube zigera ku 19,100 muri zo izigera ku 1000 zikaba ziteganyijwe gushyirwa mu bwishingizi mu gihe Inkoko 97000 bahize gushyira mu bwishingizi Inkoko 11000.
MUHIZI ELISÉE
UMUSEKE.RW i Kamonyi
