Irushanwa ry’Umurenge Kagame Cup riri kugana ku musozo

Mu gihe irushanwa ngarukamwaka ry’Imiyoborere myiza ryitiriwe Umukuru w’Igihugu, Paul Kagame, riri kugana ku musozo, amakipe azakina imikino ya nyuma muri buri cyiciro, yamaze kumenyakana.

Imikino yo kwishyura ya ½ muri iri rushanwa ry’Umurenge Kagame Cup 2025, yabaye ku wa 1 Kamena, ibera mu Akarere ka Gisagara n’aka Huye. Imikino yakinwe, ni iy’amaboko mu byiciro byose muri Basketball, Volleyball, Sitball.

Muri Volleyball mu bagabo mu itsinda rya mbere (A), Ngoma yatsinze Musanze amaseti 3-0, Nyanza yatsinze Musanze amaseti 3-1 mu gihe Ngoma yongeye gutsinda Nyanza amaseti 3-1. Mu itsinda rya Kabiri (A), Kicukiro yatsinze Rutsiro amaseti 3-2, inatsinda Bugesera amaseti 3-1. Rutsiro yaragarutse itsinda Bugesera amaseti 3-0.

Muri Volleyball mu bagore mu itsinda rya Kabiri (B), Ngoma yatsinze imikino ibiri ya Kayonza amaseti 3-0 na Ruhango amaseti 3-0. Kayonza yaragarutse itsinda Ruhango amaseti 3-0. Mu itsinda rya mbere (A), Gicumbi yatsinze imikino ibiri ya Rusizi amaseti 3-0 na Kicukiro amaseti 3-1. Rusizi yaragarutse itsinda Kicukiro amaseti 3-1.

Muri Basketball mu bagabo mu itsinda rya mbere (A), Kayonza yatsinze imikino ibiri ya Rutsiro amanota 66-63 na Nyaruguru amanota 62-41. Rutsiro yaragarutse itsinda Nyaruguru amanota 73-44. Mu itsinda rya Kabiri (B), Musanze yatsinze imikino ibiri ya Kicukiro amanota 60-55 n’uwa Kamonyi 49-41. Kicukiro yo yatsinze Kamonyi Kamonyi amanota 64-52.

Mu cyiciro cy’abagore muri Basketball mu itsinda rya mbere (A), Musanze yatsinze imikino ibiri ya Kicukiro amanota 57-46 n’uwa Kayonza ku manota 46-42. Kayonza yaragarutse itsinda Kicukiro amanota 57-46. Mu itsinda rya Kabiri (B), Kamonyi yatsinze imikino ibiri ya Rutsiro amanota 74-32 n’uwa Nyamagabe amanota 74-28. Nyamagabe yaragarutse itsinda Rutsiro amanota 53-32.

No mu bafite ubumuga, habaye imikino ya Sitball. Mu bagabo mu itsinda rya mbere (A), Kirehe yatsinze imikino ibiri ya Kamonyi amanota 32-14 n’uwa Rubavu ku manota 30-26. Rubavu yaragarutse itsinda Kamonyi amanota 25-17. Mu itsinda rya Kabiri (B), Musanze yatsinze Nyagatare amanota 29-26. Gasabo na yo yatsinze Nyagatare amanota 27-21 mu gihe Gasabo yatsinzwe na Musanze amanota 25-23.

Muri Sitball mu itsinda rya mbere (A) mu bagore, Gicumbi yatsinze imikino ibiri ya Rubavu ku manota 30-13 n’uwa Nyarugenge ku manota 26-18. Rubavu yaragarutse itsinda Nyarugenge amanota 29-19. Mu itsinda rya Kabiri (B), Bugesera yatsinze Kamonyi amanota 27-22 ariko na yo itsindwa na Kirehe amanota 26-24. Kamonyi yaragarutse itsinda Kirehe amanota 39-38.

Amakipe yabonye itike yo kuzakina imikino ya ½:

Muri Basketball mu bagabo, ni Rutsiro, Musanze, Kayonza na Kicukiro, mu gihe mu bagore ari Nyamagabe, Kamonyi, Kayonza na Musanze. Muri Volleyball mu bagabo, ni Ngoma, Kicukiro, Rutsiro na Nyanza, mu gihe mu bagore ari Gicumbi, Rusizi, Ngoma na Kayonza.

Muri Sitball mu bagabo, ni Kirehe, Musanze, Gasabo na Rubavu, mu gihe mu bagore ari Gicumbi, Rubavu, Kirehe na Bugesera. Mu mupira w’amaguru, ikipe y’Umurenge wa Jabana mu Akarere ka Nyarugenge, yageze ku mukino wa nyuma isezereye iy’Umurenge wa Kimonyi muri Musanze ibitego 3-1. Izahura n’Umurenge wa Bwishyura wo mu Akarere ka Karongi nyuma yo gusezerera Umurenge wa Mbazi wo mu Akarere ka Huye.

Imikino ya ½ n’iya nyuma, iteganyijwe ku wa 14-15 Kamena 2025 mu Akarere ka Musanze. Ku wa 10 Mutarama, ni bwo irushanwa ry’uyu mwaka, ryatangirijwe mu Akarere ka Nyaruguru mu Intara y’Amajyepfo.