Rusizi: Inzu y’ubucuruzi yafashwe n’inkongi y’umuriro hahiramo ibifite agaciro ka Miliyoni 10 z’amafaranga y’u Rwanda.
Inzu y’ubucuruzi igizwe n’imiryango itandatu ikorerwamo ubucuruzi bunyuranye, yafashwe n’inkongi y’umuriro hashya umuryango umwe ucuruzizwamo na depo ebyiri.
Iyi nkongi y’umuriro yibasiye iyi nzu kuri uyu wa Gatatu tariki ya 24 Nzeri 2025 ku isaha ya sa tanu z’amanywa (11h00 a.m). Byabereye mu mudugudu wa Kabeza akagari ka Gihundwe Umurenge wa Kamembe mu karere ka Rusizi.
Bimwe mu byahiriye muri iyi nzu yakorerwagamo ubucuruzi bw’ibikomoka ku mbaho, birimo intebe za salon, n’ibikoresho by’imitako.
Umunyamabanga nshingwabikorwa w’umurenge wa Kamembe, Ingabire Joyeux yahamirije UMUSEKE ko iyo nzu yafashwe n’inkongi, yatewe n’amashanyarazi. Nta bwishingizi yari ifite kimwe n’ibyari biyirimo.
Ati “Nta muntu wayihiriyemo, ibyahiriyemo bifite agaciro ka Miliyoni 10Frw. Icyateye inkongi ni amashanyarazi.”
Ku bufatanye bw’abaturage, inzego z’ubuyobozi bw’umurenge, Polisi y’igihugu na Dasso zatabaye zibasha kuzimya iyi nkongi y’umuriro ntiyakwira mu nzu yegereye iyafashwe n’inkongi.
MUHIRE Donatien
UMUSEKE.RW/ RUSIZI.
