Igisirikare cya Repubulika ya Demokarasi ya Congo cyasohoye itangazo cyereka amahanga ko ihuriro AFC/M23 ryagabye ibitero by’umusubizo ku birindiro byacyo.
Ibi bitero ngo byibanze cyane muri Kivu ya Ruguru na Kivu y’Amajyepfo.
Itangazo ryo ku wa Kabiri tariki 19 Kanama, 2025, FARDC igaragariza amahanga ko yiyamye ubushotoranyi buhoraho, bw’ibitero by’ihuriro Alliance Fleuve Congo ifatanya na M23 ku birindiro biri muri Kivu ya Ruguru no muri Kivu y’amajyepfo.
Ku matariki atandukanye FARDC ivuga ko yagabweho ibitero na AFC/M23 hafi y’ikiyaga cya Edouard muri Teritwari ya Lubero ku birindiro byayo ahitwa Musenda ahaba ingabo zirwanira mu mazi. Iki gitero FARDC ivuga ko cyabaye tariki 11 Kanama, 2025.
Ibitero byinshi FARDC ivuga ko yabigabweho muri Teritwari ya Walungu na Mwenga muri Kivu y’Amajyepfo.
Ahitwa i Mulamba muri Walungu ingabo za Congo zivuga ko hagabwe ibitero tariki 12 Kanama, 2025, naho ahitwa Lwindi na Muhuzi haterwa tariki 16 na tariki 18 Kanama, 2025.
AFC/M23 kandi ngo yateye ahitwa Gahuruza n’ahitwa Nzibira, Kankinda muri Walungu.
Igisirikare cya Congo gishinja AFC/M23 kwica amasezerano yasinyiwe i Washington kimwe n’imbanzirizamushinga y’amahoro yemejwe i Doha hagati ya AFC/M23 na Leta ya Congo.
FARDC ivuga ko itanga umugabo ku bahuza barimo America na Qatar kuri ibyo bikorwa byo kurenga ku gahenge kemejwe, ikavuga ko ibyo bitero uretse kurenga ku masezerano y’amahoro binagwamo abantu abandi baguhanga ingo zabo.
Igisirikare cya Congo kivuga ko ubu gifashe ingamba zikwiye kugira ngo gihangane n’ibikorwa byose by’ubushotoranyi bihungabanya umutekano w’abaturage.
Kugeza ubu ntacyo AFC/M23 iravuga kuri iri tangazo, gusa hashize iminsi havugwa imirwano hagati ya AFC/M23 n’ingabo za Congo zifatanya n’imitwe itandukanye ya Wazalendo.
Mu kiganiro Bertrand Bisimwa, Perezida wa M23 aherutse guha Kivu Morning Post yavuze ko kuva ariya masezerano yasinywa Congo itigeze ihagarika imirwano, ko ibyo ivuga ari ukurangaza amahanga.
Yavuze ko Congo yazanye ingabo mu bice bigana mu Burasirazuba, ndetse ngo ikaba ikorana n’u Burundi kugaba ibitero bikoresha indege zitagira abapilote.
Bisimwa avuga ko bari mu ntambara na leta ya Congo kandi ko leta ishaka kwagira iyo ntambara.
UMUSEKE.RW
