Nyuma yo gutsinda ikipe y’umupira w’amaguru y’Urwego rw’Igihugu rw’Iterambere (RDB), ibitego 4-2, ikipe y’umupira w’amaguru y’Ikigo cy’Igihugu Gishinzwe Kwita ku Buzima (RBC), yegukanye igikombe cy’irushanwa ryo Kwibuka ku nshuro ya 31 Jenoside yakorewe Abatutsi mu 1994, ritegurwa n’Ishyirahamwe ry’Imikino y’Abakozi mu Rwanda (ARPST).
Mu gihe u Rwanda n’Isi muri rusange, bakiri mu minsi 100 yo Kwibuka ku nshuro ya 31 Jenoside yakorewe Abatutsi muri Mata 1994, inzego zitandukanye zikomeje gukora ibikorwa birimo kuzirikana Abatutsi bishwe bazizwa uko bavutse. Aha harimo gutegura amarushanwa muri siporo zitandukanye.
Ni ku bw’iyo mpamvu biciye mu bufatanye na Minisiteri ya Siporo, Ishyirahamwe ry’Imikino y’Abakozi mu Rwanda (ARPST), ryateguye irushanwa ryo Kwibuka abari abakozi mu bigo bitandukanye bishwe muri Jenoside muri Mata 1994.
Irushanwa ry’uyu mwaka, ryitabiriwe n’amakipe ane ya mbere muri Volleyball mu byiciro byombi (abagabo n’abagore) n’ayabaye ane ya mbere muri shampiyona y’umupira w’amaguru.
Muri Volleyball mu bagabo, hitabiriye Ikigo cy’Igihugu cy’Ibarurimibare (NISR), Immigration, Minisiteri y’Ubuzima na Minisiteri ya Siporo. Mu cyiciro cy’Abagore, hitabiriye RRA, REG, Wasac na RBC. Mu mupira w’amaguru, hitabiriye RBC FC, RDB FC, REG FC na Wasac FC.
Imikino ya nyuma yabaye ku wa Gatanu tariki ya 30 Gicurasi 2025 ku bibuga bitandukanye. RBC FC yatsinze RDB FC ibitego 4-2, ihita yegukana igikombe cy’uyu mwaka. Muri Volleyball mu cyiciro cy’Abagore, RBC yatsinze RRA amaseti 3-0 ihita yegukana igikombe.
Muri Volleyball mu cyiciro cy’Abagabo, Immigration yatsinze Minisiteri y’Ubuzima amaseti 3-0, ihita yegukana igikombe cy’uyu mwaka. Mu bitabiriye umuhango wo guhemba, harimo abayobozi batandukanye barimo Mpamo Thierry Tigos uyobora ARPST, Munyana Cynthia uyobora Ishyirahamwe ry’Umukino wo Koga mu Rwanda n’abandi.
Iminsi 100 yo Kwibuka Jenoside yakorewe Abatutsi muri Mata 1994, itangira muri Mata ikarangira Nyakanga buri mwaka.
UMUSEKE.RW
