Noble Family Church na Women Foundation Ministries iyobowe na Apôtre Alice Mignonne Kabera bateguye igiterane mpuzamahanga cy’ivugabutumwa “All Women Together 2025”, kigamije kubaka umugore mu buryo bw’umwuka no kumufasha kuzamura ubushobozi bwo gutsinda ibimutsikamira.
Iki giterane kizaba ku nshuro ya 13, guhera tariki ya 12 kugeza ku ya 15 Nyakanga 2025, kibere muri Kigali Convention Center mu Mujyi wa Kigali, gifite insanganyamatsiko igira iti: “Kuva mu gutsikamirwa tujya mu butsinzi”.
Mu minsi itatu ya mbere y’iki giterane, ni abari n’abategarugori bazitabira, naho ku munsi wa kane hakazitabira n’abagabo, kugira ngo nabo bumve kandi bafatanye mu rugendo rwo kubaka umuryango uhamye wubakiye kuri Kristo.
Uretse kuramya no guhimbaza Imana nk’umusingi w’iki giterane, hazanatangwa ubuhamya bushimangira imbaraga z’Imana, ubufasha butandukanye, amasengesho yo gusana imitima, n’ijambo ry’Imana ryigisha kandi ryubaka.
Iki giterane cyatumiwemo abavugabutumwa baturutse mu bihugu birindwi byo ku migabane y’i Burayi, barimo Pastor Jessica Kayanja (Uganda), Lady Bishop Funke Felix-Adejumo (Nigeria) na Pastor Matthew Ashimolowo wo mu Bwongereza.
Barimo kandi Rev. Julian Kyula (Kenya), Dr. Patience Mlengana (Afurika y’Epfo), Charisa Munroe-Wilborn (Leta Zunze Ubumwe za Amerika) na Dr. Ipyana Kibona wo muri Tanzania.
Uretse abo bavugabutumwa bazaba baturutse mu mahanga, iki giterane cyatumiwemo n’umuhanzi Israel Mbonyi, umwe mu bakunzwe cyane mu Rwanda ndetse no muri Afurika y’Iburasirazuba.
Mu mwaka ushize, abagera ku 1,286 bitabiriye iki giterane baturutse hanze y’u Rwanda, bakomoka mu bihugu bitandukanye ku Isi.
All Women Together imaze kumenyekana nk’igiterane cyagize uruhare rukomeye mu mpinduka zifatika mu buzima bw’abagore benshi, haba mu buryo bw’umwuka, imibanire, ndetse n’iterambere rusange.
Ubuyobozi bwa Women Foundation Ministries burasaba abagore, abakobwa n’abagabo kwiyandikisha hakiri kare kugira ngo bitabire iki giterane gihindura ubuzima bwa benshi.
NDEKEZI JOHNSON / UMUSEKE.RW
