Korali Ichthus Gloria, itsinda ry’abaririmbyi rikora ivugabutumwa muri Serivisi Mpuzamahanga mu itorero rya ADEPR Nyarugenge ryatangaje ko rizafatanya n’umuryamyi Chryso Ndasingwa na Ntora worship team mu gitaramo cyiswe ‘Free Indeed Worship Experience.’
Ni igitaramo kizaba tariki ya 05 Ukwakira 2025 mu ihema rya Camp Kigali guhera saa Kumi z’amanywa, kwinjira bikaba byagizwe ubuntu mu rwego rwo kugeza ubutumwa bwiza ku bantu b’ingeri zose.
Mu myaka irenga 25 imaze mu ivugabutumwa, Korali Ichthus Gloria imaze gushyira hanze imizingo (albums) y’indirimbo z’amajwi 3 ari zo: Saintete a l’ Eternelle, Il se soucie de toi na Take me deeper.
Mu rugendo rwo kwagura ibikorwa by’ivugabutumwa n’umuziki, iyi korali yatangiye umushinga wagutse wo gushyira hanze n’ indirimbo z’amashusho.
Kugeza ubu bamaze gushyira hanze indirimbo z’amashusho 2 zirimo “EL Roi na ‘I am’.
Gukoresha indimi mpuzamahanga zirimo Icyongereza, Igifaransa n’ Igishwahili ni uburyo bwihariye iri tsinda rikoresha mu kugeza ubutumwa bwiza kuri benshi.
Kugeza ubu Korali igizwe n’ abanyamuryango 71 b’ingeri zitandukanye zirimo urubyiruko n’abakuze.
Muri iri tsinda kandi usangamo abahanga bazwi mu gihugu mu gutunganya umuziki nka Producer Boris ndetse n’abatunganya amashusho nka Shalom Gabris n’abacuranzi bafite ubumenyi bakuye mu ishuri ry’umuziki rya Nyundo.
Ubuyobozi bw’iyi korali buvuga ko igihe cyari kigeze ngo iri tsinda rirenge imbibi zo gukorera mu rusengero gusa.
Buti: “ Uwiteka yakoze byinshi mu itsinda ryacu. Yaratwaguye mu buryo bwose none igihe ni iki kugira ngo impano Imana yaduhaye zikoreshwe kugeza ubutumwa bwiza mu mahanga. Iki ni cyo gihe cyo kurenga imbibi tukagera no ku mpande zose zitandukanye z’Isi. Igitaramo ‘Free Indeed Worship Experience’ ni umwanya mwiza wo gutaramira ingeri zitandukanye z’abakunzi b’indirimbo zo kuramya Imana no kubamenyesha ko abo Yesu yabatuye babaturwa byuzuye.”
Muri iki gitaramo hazafatirwamo amashusho y’indirimbo nshya 6 zanditswe mu ndimi 4-Icyongereza, Igifaransa, Igiswahili n’Ikinyarwanda.
Bakomeza bagira bati; “ Imana yacu nta mbibi igira ni yo mpamvu tugomba kugera ku bantu bose. kandi twizeye ko Umwuka Wera azaherekeza ibihangano byacu bikagira umumaro mu buzima bw’abazabyumva bo mu ndimi zose no mu moko yose yo mu Isi.”
Reba indirimbo za Korali Ichthus Gloria
NDEKEZI JOHNSON/ UMUSEKE.RW
