Mu rwego rwo gukaza umutekano muri Stade y’Igihugu yitiriwe Mandela ‘Mandela National Stadium’, abafana baza kuyireberamo imikino y’Igikombe cya Afurika cy’Abakina muri za Shampiyona z’iwabo [CHAN 2024], babwiwe ko kuzana Vuvuzela bitemewe.
Kuri uyu wa Kane, Polisi ya Uganda, yasohoye Itangazo rikubiyemo ingamba zafashwe mu rwego rwo kurinda neza no gucungira umutekano abaza kureba imikino ya CHAN muri Mandela National Stadium.
Kimwe mu byabujijwe abafana bitemewe muri iyi Stade, harimo Vuvuzela. Mu bindi bitemewe, ni amacupa akoze mu birahuri, ibikoresho byohereza ibyuka biryana mu maso [Fireworks], za camera zifata amashusho n’ibindi byose byahungabanya umutekano kuri iyi Stade.
Iyi Stade biteganyijwe ko ejo izakira imikino ibiri. Algérie izakina na Afurika y’Epfo Saa Kumi n’Imwe z’amanywa za Kampala mu gihe Uganda Cranes izakina na Guinéa Saa Mbiri z’ijoro za hariya.
Imikino yo mu itsinda rya Gatatu [C] ririmo Uganda, Algérie, Niger na Guinéa, iri kubera muri Uganda kuri Stade y’Igihugu yitiriwe Mandela [Mandela National Stadium].
UMUSEKE.RW
