Mu gihe habura iminsi mbarwa ngo hatangire irushanwa rya CECAFA Kagame Cup 2025 rihuza amakipe yo mu Karere ka Afurika y’i Burasirazuba n’iyo Hagati, ndetse rigaterwa inkunga n’Umukuru w’Igihugu cy’u Rwanda, Paul Kagame, ikipe y’Ingabo izahagararira u Rwanda yashyizwe mu itsinda B.
Kuri uyu wa kane, ni bwo habaye tombola y’uko amakipe 12 azitabira CECAFA Kagame Cup 2025, agomba gushyirwa mu matsinda atatu. Irya Kabiri, ririmo APR FC ihagarariye u Rwanda, NEC FC yo muri Uganda, Bumamuru y’i Burundi na Mlandege FC ya Zanzibar.
Itsinda rya mbere ririmo Harde Cote FC yo muri Djibouti, Coffee SC yo muri Éthiopie, Singida Big Stars yo muri Tanzania na Kenya Police FC yo muri Kenya. Irya Gatatu ririmo Al-Hilal yo muri Sudan, Kator FC yo muri Sudan y’Epfo, Mogadishu City Club FC yo muri Somalia na Al-Ahly SC Wad Madani na yo ihagarariye Sudan.
Biteganyijwe ko iri rushanwa rizabera mu Mujyi wa Dar Es Salaam muri Tanzania kuva tariki 2-15 Nzeri 2025. Iyi mikino izakinirwa kuri Stade zirimo Azam Complex, Chamazi, Isamuyo Stadium na Stade ya KMC.
Umuyobozi Nshingwabikorwa muri CECAFA, Auka Gecheo yavuze ko iri rushanwa rizanafasha amakipe yo muri aka Karere kwitegura neza amarushanwa Nyafurika ya CAF Champions League na CAF Confederation Cup.
Ati “Iri rushanwa rizanafasha amakipe yacu kwitegura neza amarushanwa Nyafurika ya CAF 2025/2026 izatangira mu mwaka utaha.
Irushanwa rya CECAFA Kagame Cup riheruka gukinwa mu mwaka ushize, Red Arrows yo muri Zambia ni yo yegukanye igikombe itsinze APR FC yo mu Rwanda.
UMUSEKE.RW
