Minisiteri y’Uburezi (MINEDUC) hamwe n’ibigo biyishamikiyeho batangaje amanota y’abanyeshuri bakoze ibizamini bisoza amashuri yisumbuye, aho 89.1% byabo batsinze.
Muri rusange abari biyandikishije gukora ibizamini bya Leta bisoza amashuri yisumbuye ni 106,418 na ho abakoze ni 106,079 bangana na (99.7%).
Abakobwa batsinze ku kigero cya 85.5%, mu gihe abahungu batsinze ku kigero cya 93.5%.
Akarere ka Kayonza kaje ku mwanya wa mbere mu gutsindisha ku kigero cya 96.9%, Kirehe ikurikiraho na 95.6%, naho Rulindo iza ku mwanya wa gatatu na 94.9%.
Mu mashuri y’ubumenyi rusange, abiyandikishije gukora ibizamini bari 61,942, abakoze ibizamini 61,737, abakosowe bari 61,683, naho abatsinze bakaba 51,667. Igipimo cy’intsinzi rusange ni 83.8%.
Mu mashuri ya tekiniki n’ubumenyingiro (TSS), abiyandikishije gukora ibizamini bari 36,254, abakoze ibizamini 36,141, abakosowe 36,130, naho abatsinze ibizamini bya Leta 35,393. Igipimo cy’intsinzi rusange ni 98.0%.
Muri ‘Professional Education’ abiyandikishije gukora ibizamini bari 8,222, abakoze ibizamini 8,201, abakosowe 8,184, naho abatsinze ibizamini bya Leta bakaba 7,349. Igipimo cy’intsinzi rusange ni 89.8%.
Minisitiri w’Uburezi, Joseph Nsengimana, yavuze ko amanota yajyaga atangazwa mu Ukuboza bigatuma abana batsinzwe badashobora gutangira amasomo rimwe n’abandi.
Ati” Bizafasha abanyeshuri ari abatsinze kujya muri za Kaminuza cyangwa se abatabashije gutsinda bakaba basubiramo bafite umwanya uhagije wo gutangirana n’abandi.”
Abahize abandi mu byiciro bitandukanye bashimiwe ku muhate bagaragaje, bahabwa ibihembo kandi basabwe kuzitwara neza muri kaminuza.
Kureba amanota y’ibizamini bya Leta bisoza amashuri yisumbuye umwaka w’amashuri wa 2024/2025 (A’Level) mwanyura kuri iyi “Link”: secondary.sdms.gov.rw
Reba uko abanyeshuri n’ibigo byahize abandi mu byiciro bitandukanye
NDEKEZI JOHNSON / UMUSEKE.RW
