Amagare: Ibyo wamenya kuri Shampiyona y’Isi igiye kubera i Kigali

Mu gihe hasigaye iminsi ibarirwa ku ntoki ngo u Rwanda rwakire shampiyona y’Isi yo Gusiganwa ku Magare [UCI Road Championship 2025], abakinnyi barenga 900 bavuye mu bihugu birenga 100, bazaba bahanzwe amaso mu mihanda y’i Kigali.

Tariki 21-28 Nzeri 2025, mu Rwanda hazaba hari kubera Shampiyona y’Umukino wo Gusiganwa ku Magare, UCI Road Championship 2025. Ni isiganwa rihanzwe amaso na benshi mu bakunzi b’uyu mukino mu Rwanda no hanze ya rwo.

Bimwe mu byo kumenya kuri iri siganwa!

• Abakinnyi 915 baturutse mu bihugu 107, ni bo bazaba bahanzwe amaso.

Ni umubare munini w’abakinnyi, ubashije kubaho mu isiganwa ry’amagare mu gice cyo ku muhanda [Road Race] hatarimo andi marushanwa arimo Track, Mountain Bike, BMX Racing, BMX Freestyle, Cyclo-cross, Trials, Indoor Cycling, Cycling Esports, Cravel na Snow Bike.

• Ni ubwa mbere Umugabane wa Afurika ugize umubare munini muri iri siganwa!

Umugabane wa Afurika, ufite ibihugu 38 bizakina iri siganwa, u Burayi bwohereje ibihugu 35, Umugabane wa Amerika ufitemo ibihugu 20, Aziya ifite ibihugu 16, Oseyaniya ifitemo ibihugu bitatu mu gihe Refugee Cycling Continent ifitemo igihugu kimwe.

• Amashuri yo mu Mujyi wa Kigali, azaha ikiruhuko abanyeshuri!

Mu itangazo riherutse gushyirwa hanze n’Umujyi wa Kigali, amashuri yose yo mu Mujyi wa Kigali, yibukijwe ko azaba afunze kuva tariki 21-28 Nzeri 2025 kugira ngo iri siganwa rizagende neza.

Ibigo by’amashuri y’incuke, abanza, ayisumbuye ndetse n’aya za kaminuza ko abanyeshuri bazagaruka ku ishuri tariki ya 29 Nzeri ariko ko iminsi bamaze batiga igomba kuzongerwa ku ngengabihe y’uyu mwaka.

Amashuri yasabwe gutegura uburyo bwo kwigisha hakoreshejwe Ikoranabuhanga, abana bagahabwa imikoro yo gukorera mu rugo cyangwa andi masomo afasha abanyeshuri muri iki gihe bazaba batiga.

• Ni ubwa mbere iru siganwa rigiye kubera muri Afurika!

Kuva shampiyona y’Isi yatangira mu 1921, ni ubwa mbere rigiye kubera ku Mugabane wa Afurika, by’umwihariko rikaba rigiye kubera mu Gihugu cy’u Rwanda.

Bivuga ngo mu myaka 104 ishize, ryakinirwaga ku yindi Migabane itarimo uwa Afurika.

• Abanyarwanda 23 muri 30 bari mwiherero, ni bo bazahagararira u Rwanda muri iri siganwa!

Mu bakinnyi basaga 30 bamaze iminsi mu mwiherero w’Ikipe y’Igihugu y’u Rwanda, 23 gusa ni bo bazakina amarushanwa y’ibyiciro bitandukanye.

Uyu mubare ushingiye ku wo u Rwanda rwemerewe n’Impuzamashyirahamwe y’Umukino w’Amagare ku Isi (UCI), aho mu bagabo hazakina abakinnyi batandatu naho mu bagore hagakina bane mu masiganwa yo mu muhanda.

Mu bahungu n’abakobwa batarengeje imyaka 23 hazakina bane muri buri cyiciro, mu bakobwa n’abahungu batarengeje imyaka 19 hakine babiri muri buri cyiciro.

Uko bazakina mu masiganwa!

Isiganwa ryo mu muhanda ry’abagabo: Manizabayo Eric, Masengesho Vainqueur, Mugisha Moïse, Muhoza Eric, Nkundabera Eric na Nsengiyuma Shemu.

Isiganwa ryo mu muhanda ry’abagore: Ingabire Diane, Irakoze Neza Violette, Nirere Xaveline na Nzayisenga Valentine.

Isiganwa rya ITT [gusiganwa n’igihe buri wese ukwe] mu bagabo: Mugisha Moïse na Nsengiyuma Shemu.

Isiganwa rya ITT mu bagore: Ingabire Diane na Nirere Xaveline.

Isiganwa ryo mu muhanda ry’abahungu batarengeje imyaka 23: Niyonkuru Samuel, Ruhumuriza Aimé, Tuyizere Etienne na Ufitimana Shadrack.

Isiganwa ryo mu muhanda ry’abakobwa batarengeje imyaka 23: Iragena Charlotte, Mwamikazi Jazilla, Ntakirutimana Martha na Nyirarukundo Claudette.

Isiganwa rya ITT ry’abahungu batarengeje imyaka 23: Niyonkuru Samuel, Nshutiraguma Kevin na Tuyizere Étienne.

Isiganwa rya ITT ry’abakobwa batarengeje imyaka 23: Mwamikazi Jazilla na Nyirarukundo Claudette.

Isiganwa ryo mu muhanda ry’abahungu batarengeje imyaka 19: Nkuriliyinka Jackson na Ntirenganya Moïse.

Isiganwa ryo mu muhanda ry’abakobwa batarengeje imyaka 19: Uwiringiyimana Liliane na Masengesho Yvonne.

Isiganwa ry’abahungu batarengeje imyaka 19: Ishimwe Brian na Byusa Pacifique.

Isiganwa rya ITT mu bakobwa batarengeje imyaka 19: Uwiringiyimana Liliane na Masengesho Yvonne.

Gusiganwa nk’ikipe: Amakipe yo muri Afurika azakina ni Bénin, Ethiopia, Ibirwa bya Maurice, u Rwanda, Uganda n’Ikipe ya World Cycling Centre.

Ikipe y’u Rwanda izaba igizwe n’abahungu batatu n’abakobwa batatu: Byukusenge Patrick, Ingabire Diane, Nirere Xaveline, Nkundabera Eric, Nyirarukundo Claudette, Nantume Miria (World Cycling Center) na Uwiduhaye Mike.

Mu bakinnyi ikipe iba yaratanze, haba hari abazifashishwa mu isiganwa (twagaragaje), ariko hakaba n’abashobora kugira uwo basimbura.

• Menya imihanda izakoreshwa mu gihe cy’isiganwa!

Kuva ku munsi wa mbere kugeza ku wa Gatatu, tariki 21-23 Nzeri 2025 bazahera kuri BK Arena.

Hazakoreshwa: BK Arena-Kimironko Simba-Chez Lando-Prince House-Sonatube-Nyanza Kicukiro-Gahanga-Sonatube-Rwandex-Mu Kanogo-Roundbout yo mu Mujyi.

Umunsi wa kane, tariki 24 Nzeri 2025. KCC-Gishushu-Chez Lando-Prince House-Sonatube-Nyanza Kicukiro-Sonatube-Rwandex-Mu Kanogo-Kwa Mignone-KCC.

Umunsi wa Gatanu kugeza ku wa Karindwi, tariki ya 25-27 Nzeri 2025. KCC-Gishushu-Nyarutarama-Minagri-Ambasade y’Abaholande-Kimihurura-Cadillac-Kwa Mignone-KCC.

Umunsi wa nyuma w’isiganwa, tariki ya 28 Nzeri 2025. Hazakoreshwa imihanda izaba yakoreshejwe ku munsi wa Gatanu kugeza ku wa Karindwi ariko haziyongeraho indi irimo Sopetrade-Peyaje-Roundabout yo mu Mujyi-Muhima-Nyabugogo-Gitinyoni-Ruliba-Karama Norvège-Nyamirambo-Kimisagara-Kwa Mutwe-Mu Biryogo-Gitega-Roundabout yo mu Mujyi-Peyaje-Roundabout yo mu Kanogo-Sopetrade-Cadillac-Kwa Mignone-KCC.

UMUSEKE.RW