Abarenga 300 barimo abakorera mu Isoko ry’Imari n’Imigabane, ba rwiyemezamirimo n’abashoramari bazahurira i Kigali mu Nama ya 28 y’Ihuriro ry’Amasoko y’Imari n’Imigabane muri Afurika (ASEA).
Ni inama u Rwanda rugiye kongera kwakira, nyuma y’uko rwaherukaga kuyakira mu mwaka wa 2016.
Iyo nama ngarukamwaka izatangira ku wa 26 kugeza ku wa 28 Ugushyingo 2025, ku nsanganyamatsiko igira iti: ”Guhangana n’impinduka ku isoko mpuzamahanga; inzira y’iterambere ry’amasoko y’imari ya Afurika.”
Izitabirwa n’abarimo abashinzwe Isoko ry’Imari n’Imigabane, ba rwiyemezamirimo, abashoramari n’abandi bafatanyabikorwa.
Byitezwe ko bazaganira ku bibazo byugarije amasoko y’imari n’imigabane muri Afurika n’uburyo byahabwa umurongo.
Umuyobozi Mukuru w’Ikigo cy’Imari n’Imigabane mu Rwanda (RSE), Rwabukumba Pierre Célestin, yagaragaje ko amasoko y’imari n’imigabane muri Afurika akiri ku rwego rwo hasi bitewe na bamwe batarayasobanukirwa
Ati “Kuki tutakwicara hamwe ngo dutekereze kugura imigabane mu masosiyete yacu? Kuki tutagura impapuro mpeshamwenda ngo zubake imihanda yacu tukagombera kujya gushaka akimuhana kandi kaza imvura ihise?”
Rwabukumba unayoboye Ihuriro ry’Imari n’Imigabane muri Afurika (ASEA), yavuze ko kuba abakomoka hanze y’Umugabane ari bo bafite ijambo rinini mu isoko ry’imari n’imigabane rya Afurika biyigiraho ingaruka zirimo no kudindira mu iterambere.
Ihuriro ry’Imari n’Imigabane muri Afurika (ASEA) rimaze imyaka 32 riri mu rugamba rwo guteza imbere ibijyanye n’imari n’amasoko ku Mugabane wa Afurika.
UMUSEKE.RW
