Nyuma yo kwegukana igikombe cya Afurika batsinze Maroc ibitego 3-2 ku mukino, abakinnyi b’ikipe y’igihugu ya Nigeria y’abagore [Super Falcons], bemerewe agahimbazamusyi ka miliyoni zirenga 140 Frw n’inzu.
Ku wa Gatandatu tariki ya 26 Nyakanga 2025, ni bwo hasojwe irushanwa ry’Igikombe cya Afurika cy’abagore cyaberaga muri Maroc. Ni irushanwa ryarangiye Nigeria yegukanye igikombe ku ntsinzi y’ibitego 3-2 yatsinze Maroc yari mu rugo.
Nyuma yo kwegukana igikombe cya bo cya 10, Perezida wa Nigeria, Bola Tinubu, yemereye aba bakinnyi ibihumbi 100$ [arenga gato miliyoni 144 Frw] n’inzu y’ibyumba bitatu kuri buri umwe muri 24 bari ku rutonde. Buri umwe ugize itsinda ry’abatoza yahawe ibihumbi 50$ [arenga gato miliyoni 72 Frw].
Kapiteni wa Super Falcons, Rasheedat Ajibade, yashimiye cyane Umukuru w’Igihugu cya bo, Bola Tinubu, ku bwo kubashyigikira ariko anashimira bagenzi be ku bwitange bakoranye kugeza begukanye igikombe.
Aba bakobwa babitse ibikombe 10 muri 13 bimaze gukinwa mu bagore kuva iri rushanwa ryatangira gukinwa mu 1998.
UMUSEKE.RW
