Abajenerali bakekwaho umugambi wo guhirika Tshisekedi bari mu mazi abira

Jenerali Christian Tshiwewe Songesa, usanzwe ari umujyanama mukuru wa Perezida Félix Antoine Tshisekedi mu by’umutekano, na bagenzi be bari mu mazi abiri nyuma yo gukekwaho gushaka gukora kudeta (Coup d’État).

Amakuru aturuka i Kinshasa avuga ko itsinda riyobowe na Jenerali wahoze ari Umugaba Mukuru wa FARDC ryari rimaze kunoza umugambi wo guhirika Shebuja, bafitanye umubano mubi muri ibi bihe.

Ubwo uwo mugambi wavumburwaga, Lt. Gen Christian Tshiwewe, Lt. Gen Jean-Claude Yav, Gen. Maj Maurice Nyembo, hamwe na Colonel umwe bahise batabwa muri yombi.

Kuva mu gitondo cyo kuri uyu wa Kane, nta winjira cyangwa usohoka mu rugo rwa Jenerali Tshiwewe. Abarinzi be bambuwe imbunda, kandi bamwe mu nshuti ze na bo batawe muri yombi.

Ibi bije nyuma y’uko mu gitondo cyo ku wa Mbere, tariki ya 7 Nyakanga 2025, Lt. Gen Jean-Claude Yav yari yategetswe kudasohoka mu rugo rwe i Kinshasa n’Urwego rushinzwe iperereza rya gisirikare.

Ku wa Kabiri, Lt. Gen Jean-Claude Yav yajyanwe ku biro bya CNS guhatwa ibibazo, ariko aza kurekurwa, naho Lt. Gen Christian Tshiwewe akomeza kubazwa.

Mu ijoro ryo kuri uwo munsi, uruhigi rwatangiye kuri Gen. Maj Maurice Nyembo, wahoze ari umuyobozi w’ibiro bya Gen Tshiwewe mu gihe yari Umugaba Mukuru w’ingabo za RDC.

Umugore wa Jenerali Nyembo yavuze ko uyu musirikare mukuru yaje gufatwa ahagana saa munani z’ijoro, asaba ko yajya kubazwa ibyo akekwaho bwakeye.

Ahagana ku isaha ya saa kumi n’imwe n’igice zo mu gitondo cyo ku wa Gatatu, Gen Nyembo yambaye imyambaro y’akazi baramutwara.

Amakuru aturuka i Kinshasa avuga ko na Colonel Adelard Mwiza, ushinzwe umutekano wa Lieutenant-Général Christian Tshiwewe by’umwihariko, na we yatawe muri yombi.

NDEKEZI JOHNSON / UMUSEKE.RW