Abana b’abakobwa bakina umupira w’amaguru bo mu Akarere ka Rubavu, bibukijwe ko mu gihe bakomeza uwo mwuga babishyizeho umutima ndetse bakabikunda, byabahindurira ubuzima.
Ku wa Gatandatu tariki ya 26 Nyakanga mu Akarere ka Rubavu kuri Stade Umuganda, hahuriye amarerero yigisha umupira w’amaguru mu cyiciro cy’abana b’abakobwa. Abangavu bagera kuri 94, ni bo bahuriye kuri iyi stade muri gahunda yo kubashishikariza no kubakundisha umupira w’amaguru.
Iyi gahunda yiswe ‘FIFA Women’s Football Compaign’, isanzwe iterwa inkunga na FIFA biciye mu Ishyirahamwe ry’Umupira w’Amaguru mu Rwanda, Ferwafa, mu gice kireberera iterambere ry’umupira w’amaguru w’abagore muri iri shyirahamwe.
Ni gahunda yitabiriwe n’abana b’abakobwa bari munsi y’imyaka 13 na 15. Bamwe mu bari baje gushyigikira aba bana, harimo Casa Mbungo André usanzwe ari umutoza w’ikipe y’Igihugu y’umupira w’amaguru y’abagore [She-Amavubi] akaba n’ushinzwe Iterambere rya ruhago y’abagore mu Rwanda, Komiseri Ushinzwe Iterambere ry’Umupira w’Amaguru w’Abagore, Munyankaka Ancille, impuguke muri FIFA zishinzwe gukurikirana uyu mushinga, Azihar na Sibanda ndetse n’abandi babarizwa muri Komisiyo Ishinzwe Iterambere rya ruhago y’Abagore muri Ferwafa.
Aba bana, bahurijwe ku kibuga cya stade Umuganda, babanza kwerekwa n’abatoza ibyo bakora mbere y’uko batangira gukina hagati ya bo. Abari munsi y’imyaka 13 bashyizwe mu gice cya bo no mu batarengeje 15 bigenda uko.
Mu byiciro byombi by’imyaka, Irerero rya White FA, ni ryo ryegukanye igikombe byombi. Nyuma y’imikino, abana baganirijwe na Sibanda wari mu bahagarariye FIFA, abibutsa ko bifitemo impano ahubwo bakwiye kuzibyaza umusaruro kuko Igihugu kibashyigikiye kuri buri kimwe.
Komiseri Ushinzwe Iterambere ry’Umupira w’Amaguru w’Abagore muri Ferwafa, Munyankaka Ancille, ahamya ko igikorwa cy’uyu munsi cyagenze neza kandi babona ko hari ibyo kwishimira byinshi kuri uyu mushinga wo gukundisha no gushishikariza abana b’abakobwa gukina umupira.
Ati “Igikorwa cy’uyu munsi cyagenze neza cyane. Abana bitabiriye, ababyeyi bake bitabiriye, abayobozi bitabiriye. Byatweretse ko ari igikorwa cyiza cyahuje abantu benshi ndetse n’abana muri rusange.”
Yongeyeho ati “Impinduka zirahari kuko nk’abana twakoranye na bo muri Ngoma na Huye, bagaragaje impano kuko hari abagaragaje impano bajyanwa muri TDS [umushinga wa FIFA uhuza ibigo bitandatu bya Centre d’Excellence], byatoranyije biciye mu bufatanye bw’Ishyirahamwe ry’Umupira w’Amaguru mu Rwanda, Ferwafa, na Sports Scolaire]. Ibyo rero bigaragaza impinduka kuko niyo yaba umwe biba bigaragaza ko hari impinduka nziza.”
Munyankaka yakomeje avuga ko ikindi kigaragaza impinduka nziza, ni uko abayobozi b’amakipe y’abagore bagiye bahamagara Komisiyo ibashinzwe muri Ferwafa, basaba ko uko abato bitabwaho ari na ko n’abakuru bakwiye kwitabwaho.
Ni umuhango warimo amarerero ane ariko agabanyije mu byiciro bitandukanye by’imyaka. Aha harimo White Stars FA yari ifite abari munsi y’imyaka 13 na 15, Kunda FA na yo yari ifite abari munsi y’iyo myaka, Nyakiriba ndetse na Kivu zari zifite abari munsi y’iyo myaka.
Buri rerero ryahawe imipira 10 yo gukina mu gihe amarerero yaje imbere y’ayandi na yo yahembwe imidari. Abana kandi bitaweho umunsi wose, bahabwa ibyo kurya n’ibyo kunywa kuva bageze kuri Stade kugeza batashye.
UMUSEKE.RW
