Umuholandikazi Megan Arens na mugenzi we Michiel Mouris ni bo begukanye imidali ya zahabu muri Shampiyona y’Isi y’Amagare mu cyiciro cy’abangavu n’ingimbi batarengeje imyaka 19, aho basiganwaga n’ibihe ku giti cyabo, ‘Junior Individual Time Trial’.
Megan Arens yakoresheje iminota 25 n’amasegonda 47 mu ntera ya kilometero 18.3. Michiel Mouris yakoresheje iminota 29 n’amasegonda arindwi mu ntera y’ibilometero 22.6.
Wari umunsi wa gatatu wa Shampiyona y’Isi y’Amagare iri kubera mu Mujyi wa Kigali.
Hari hatahiwe ingimbi n’abangavu batarengeje imyaka 19, aho bagombaga gusiganwa n’ibihe ku giti cyabo, ‘Junior Individual Time Trial’.
Abangavu bakoze intera y’ibilometero 18,3 guhera saa 11:06
Saa 11:06, nibwo Masengesho Yvonne yabimburiye abangavu guhaguruka, aritwara mu muhanda BK Arena – Kimironko (Simba Supermarket)-Rwahama -Chez Lando -Prince House-Sonatube – Nyanza- Kugaruka Sonatube-Rwandex-Kanogo – Mediheal – Women Foundation-Ku Muvunyi – KCC, habarwa ibihe yakoresheje.
Yasesekaye kuri Kigali Convention Center akoresheje iminota 27, amasegonda 46 n’ibyijana 58 mu ntera y’ibilometero 18.3.
Umuholandi Megan Arens wahagurutse saa sita n’iminota 12, yanyarutse mu muhanda agenda ku muvuduko w’ibilometero 42.5 ku isaha ibyatumye agera kuri Kigali Convention Center, akoresheje iminota 25 n’amasegonda 47 mu ntera ya kilometero 18.3.
Ibi byatumye yegukana umudali wa Zahabu kuko nta wundi wakoresheje ibihe bito nka we, mu cyiciro cy’abangavu batarengeje imyaka 19 mu gusiganwa n’ibihe ku muntu ku giti cye.
Yakurikiwe n’Umunya-Espagne Paula Taco warushijwe amasegonda 35, atahana umudali w’Ifeza.
Ku mwanya wa gatatu haje Umunya-Noruvege Oda Aune warushijwe amasegonda 37.
Umunyarwandakazi Masengesho Yvonne yabaye uwa 33 akoresheje iminota 29,43 aho yarushijwe iminota 3 n’amasegonda 55 n’uwa mbere.
Uwiringiyimana Liliane aba uwa 40 mu bakinnyi 47, akoresheje iminota 30, n’amasegonda 58.
Abangavu bavuyeho hakurikiraho, basaza babo n’abo batarengeje imyaka 19, aho basiganwe mu muntera ya kilometero 22.6 km.
Umunyarwanda Byusa Pacifique niwe wabimburiye abandi 85 bagombaga gusiganwa, ku isaha ya saa Saba na 54 asohoka muri BK Arena.
Yageze kuri KCC nyuma yo gukoresha iminota 34,34 ku ntera y’ibilometero 22,6.
Abakinnyi 12 bageze ku murongo usoza, Byusa akicaye mu ntebe y’icyubahiro yagenewe uwakoresheje ibihe bito kugeza ubwo Umunya-Azerbaijan, Arytom Proskuryakov, yamukuragaho nyuma yo kumurusha umunota umwe n’amasegonda 47.
Umuholandi Michiel Mouris niwe waje kwegukana umudali wa Zahabu muri Shampiyona y’Isi y’Amagare mu gusiganwa n’ibihe mu cyiciro cy’ingimbi zitarengeje imyaka 19, aho yakoresheje iminota 29,07 ku ntera y’ibilometero 22,6, yagiye mu muhanda afite umuvuduko wa kilometero 46.5 ku isaha.
Yakurikiwe n’Umunyamerika Ashlin Barry warushijwe amasegonda 6, Umubiligi Van Kerckhove Seff aza ku mwanya wa gatatu arushwa amasegonda 8 n’uwa mbere.
Mu cyiciro cy’ingimbi, Umunyarwanda wasoreje hafi ni Byusa Pacifique wabaye uwa 53 yasizwe iminota 5,27 n’umukinnyi wa mbere.
Ishimwe Brian aba uwa 55 yasizwe iminota 5,52.
Shampiyona y’Isi y’Amagare izakomeza ejo ku wa Gatatu, ubwo hazaba hazakina amakipe [Team Time Trial Mixed Relay ]; abagabo bavanze n’abagore, ku ntera y’ibilometero 41,8 guhera saa 13:45, ubwo Benin izaba ihagurutse.
Ni isiganwa rizitabirwa n’abakinnyi 90 baturutse mu bihugu 19.
MUGIRANEZA THIERRY/ UMUSEKE.RW
