Jair Bolsonaro wabaye Perezida wa Brésil hagati ya 2019 na 2023, yakatiwe gufungwa imyaka 27 n’amezi atatu muri gereza, ashinjwa gushaka guhirika ubutegetsi nyuma yo gutsindwa amatora.
Ni icyemezo cyafashwe ku wa Kane tariki ya 11 Nzeri 2025 n’Urukiko rw’Ikirenga.
Itsinda ry’abacamanza batanu, bane muri bo bahamije Bolsonaro ibyaha birimo gushaka guhindura ibyavuye mu matora yabaye mu 2022, kugambirira guhirika ubutegetsi akoresheje imbaraga za gisirikare.
Yahamwe kandi n’ibyaha birimo uruhare mu byaha byakozwe n’imitwe yitwaje intwaro, kugerageza kubangamira demokarasi akoresheje ingufu, kwangiza imitungo ya leta, no kubangamira imikorere y’inzego za leta.
Abacamanza banavuze ko Bolsonaro yari azi imigambi yo kwica Perezida Luiz Inácio Lula da Silva, uwo bari bahanganye mu matora, hamwe n’umucamanza w’Urukiko rw’Ikirenga.
Si we gusa kuko mu bandi bahamwe n’ibyaha barimo abandi bantu barindwi barimo abahoze ari ba Minisitiri b’Ingabo babiri, uwahoze ayobora urwego rw’ubutasi, n’uwahoze ari Minisitiri w’Umutekano.
Bolsonaro yahakanye ibyo yahamijwe byose avuga ko ari urubanza rugamije kumubuza gusubira ku butegetsi.
Leta zunze Ubumwe za Amerika nayo binyuze muri Perezida Donald n’Umunyamabanga wayo Ushinzwe Ububanyi n’Amahanga, Marco Rubio, bamaganye ibyavuye mu rubanza.
Ibi byamaganywe na Minisiteri y’Ububanyi n’Amahanga ya Brésil ivuga ko yamaganye iterabwoba rya Amerika.
MUGIRANEZA THIERRY/ UMUSEKE.RW
