Mbere yo kwerekeza mu mikino Nyafurika ya CECAFA izabera mu Mujyi wa Nairobi muri Kenya, Rayon Sports WFC yemerewe agahimbazamusyi k’amakaziye y’ibinyobwa by’inzoga zengwa n’uruganda rwa SKOL Ltd runabatera inkunga.
Ku Cyumweru, tariki ya 31 Kanama 2025 mu masaha y’amanywa, ni bwo abagize itsinda rya Rayon Sports WFC bafashe urugendo ruberekeza muri Kenya aho bagiye mu irushanwa rya CAF Women’s Champions League [CECAFA Qualifiers] mu gushaka itike yo kwitabira imikino Nyafurika ya CAF Women’s Champions League.
Mbere yo gufata uru rugendo, Umukozi Ushinzwe guhuza ibikorwa bya Rayon Sports n’uruganda rwa SKOL Ltd, Mukandama Hardy, yemereye abakinnyi b’iyi kipe agahimbazamusyi kangana n’amakaziye 15 y’ikinyobwa cya SKOL kuri bukino bazatsinda muri iri rushanwa.
Biteganyijwe ko umukino wa mbere iyi kipe yo mu Nzove izakina, izahura n’ikipe ibitse igikombe giheruka, CBE FC yo muri Éthiopie kuri Nyayo Stadium Saa saba z’amanywa za Nairobi ku wa kane, tariki ya 4 Nzeri 2025.
Umukino wa yo wa Kabiri wo mu matsinda ari na wo usoza amatsinda, Rayon Sports WFC izawukina ku wa mbere, tariki ya 8 Nzeri 2025 Saa saba z’amanywa kuri Ulinzi Stadium. Izakina na Top Girls Academy y’i Burundi.
Mu matsinda atatu ari muri iri rushanwa, muri buri tsinda hazazamukamo ikipe ya mbere, zibe eshatu hanyuma hashakwe indi yitwaye neza mu matsinda [best looser] maze zibe enye zizakina muri ½.
Ikipe yegukanye igikombe, ni yo ihita ibona itike yo guhagararira Akarere mu irushanwa rya CAF Women’s Champions League.
UMUSEKE.RW
