Minisitiri w’Ingabo za Mozambique, Maj Gen Cristóvão Artur Chume yatangiye uruzinduko rw’iminsi itatu mu Rwanda rugamije gushimangira ubufatanye busanzwe mu by’umutekano n’ingabo hagati y’ibihugu byombi.
Ku wa Gatandatu tariki ya 23 Kanama 2025, Minisitiri Maj Gen Cristóvão aherekejwe n’Umugaba w’Ingabo z’icyo Gihugu, Maj Gen André Rafael Mahunguane n’Umuyobozi ushinzwe Amategeko muri Polisi y’Igihugu, CP Fabião Pedro Nhancololo n’abandi basuye icyicaro gikuru cy’Ingabo z’u Rwanda.
Bagiranye ibiganiro na Minisitiri w’Ingabo z’u Rwanda, Juvenal Marizamunda, ari kumwe n’Umugaba Mukuru w’Ingabo z’u Rwanda, General Mubarakh Muganga.
Itsinda rya Mozambique ryaganirijwe ku ishusho y’umutekano mu karere, uruhare rw’u Rwanda mu kubungabunga amahoro n’umutekano ku mugabane wa Afurika ndetse no hanze yawo.
Minisitiri w’Ingabo za Mozambique yabwiye itangazamakuru ko uruzinduko rwe rugamije gukomeza ubufatanye mu bya gisirikare n’umutekano n’u Rwanda, agaragaza ko u Rwanda ari umufatanyabikorwa ukomeye kuri Mozambique mu nzego zitandukanye zirimo iz’umutekano n’iterambere ry’ubukungu n’imibereho myiza.
Kuva mu 2021, Ingabo z’u Rwanda ziri muri Mozambique aho zagiye gutanga umusanzu mu kugarura amahoro mu ntara ya Cabo Delgado yari imaze imyaka yibasirwa n’abarwanyi bagendera ku matwara akaze ya kiyisilamu byari byaratumye ibihumbi byinshi by’abaturage bahunga.
Ubu mu bice binini umutekano waragarutse ndetse n’ibikorwa birasubukurwa birimo amashuri ndetse n’abantu basubira mu byabo.
Ubu Ingabo z’u Rwanda ziri gutoza iza Mozambique mu kubafasha kubaka igisirikare gikomeye cy’ikinyamwuga.
MUGIRANEZA THIERRY/ UMUSEKE.RW
