Minisiteri y’Uburezi, MINEDUC yatangaje amanota y’abanyeshuri bakoze ibizamini bya Leta bisoza amashuri abanza n’ibisoza icyiciro rusange, mu mwaka w’amashuri wa 2024/2025, igaragaza ko abakobwa batsinze ku kigero cyo hejuru mu mashuri abanza no mu cyiciro rusange cy’amashuri yisumbuye.
Aya manota yatangarijwe ku Cyicaro cy’ Ikigo cy’Igihugu Gishinzwe Uburezi bw’Ibanze, REB giherereye i Remera kuri uyu wa 19 Kanama 2025.
Abanyeshuri ibihumbi 220, 927 ni bo biyandikishije gukora ibizamini bya Leta bisoza amashuri abanza mu mwaka w’amashuri wa 2024/2025.
Ni mu gihe abakoze ibisoza icyiciro rusange cy’ayisumbuye muri uyu mwaka w’amashuri ari 149 206.
Abakandida 219.926 bakoze ibizamini bisoza amashuri abanza; muri bo, 46.8% ni abahungu naho 53.2% ni abakobwa.
Akarere ka Kirehe kaje ku isonga mu gutsindisha neza, gakurikirwa na Kicukiro kaje ku mwanya wa kabiri, na Ngoma ku mwanya wa gatatu, mu gihe utundi turere dukurikiraho.
Mu banyeshuri barangije amashuri abanza, 15.695 bashyizwe mu mashuri acumbikira abanyeshuri, mu gihe 150.639 bashyizwe mu mashuri ya hafi y’iwabo.
Mu cyiciro rusange cy’amashuri yisumbuye, hari amashuri 1.890 yari afite abakandida. Abiyandikishije gukora ibizamini bari 149.209, mu gihe abakoze ari 148.702.
Muri aba banyeshuri, abatsinze ni 95.674. Abakobwa ni 50,2%, naho abahungu ni 49,8%.
Muri iki cyiciro, Akarere ka Kirehe kaje ku isonga mu gutsindisha, gakurikirwa na Kicukiro. Akarere ka Ngoma kaje ku mwanya wa gatatu, utundi turere dukurikiraho.
Aboherejwe mu mashuri yiga acumbikira abanyeshuri ni 20,681 mu gihe abagera 18.929 boherejwe mu mashuri biga bataha.
Aboherejwe mu mashuri ya Tekinike, Imyuga n’Ubumenyingiro (TSS) biga mu mashuri bacumbikirwa barenga ibihumbi 28 mu gihe aboherejwe mu bigo bigamo bataha ni barenga ibihumbi 20.
Aboherejwe mu mashuri nderabarezi ni 3669, aboherejwe mu mashuri y’abafasha b’abaganga (Associate Nursing) ni 545, mu gihe abahawe Ibaruramari ari 2701 bica mu bigo bibacumbikira na ho 76 bashyirwa mu mashuri bigamo bataha.
Minisitiri w’Uburezi, Joseph Nsengimana yavuze ko muri rusange Igihugu gifite intego n’umuhate wo gukomeza kuzamura ireme ry’uburezi.
Ati “Ni ngombwa rero ko dukomeza kuzamura ireme ry’uburezi, tugomba gushyiramo imbaraga ari abanyeshuri, abarimu, ababyeyi, minisiteri muri rusange, twese akazi kacu ni ukuzamura ireme ry’uburezi.”
Yakomeje agira ati:”Tugomba gukora ibishoboka byose, gutanga umusanzu wacu ari uwo guhatira abana kujya ku ishuri, kubafasha igihe bari ku ishuri, no kubaherekeza kugira ngo bashobore kwiga kandi bamenye.”
Minisitiri Nsengimana yavuze ko imbaraga inzego zishinzwe uburezi zishyira mu kuzamura ireme ry’uburezi rihabwa abana b’u Rwanda zitazasubira inyuma, ahubwo zizakomeza kongerwa.
Ati “Icyo tutazakora, ni ukubabeshya ko bamenye igihe batamenye, ariko nta mbaraga na zimwe tuzasiga inyuma kugira ngo tubafashe bashobore kumenya. Ibi ni byo bizatuma abana biteza imbere, banateze imbere Igihugu cyacu, bubake u Rwanda twifuza kandi rukwiriye.”
Ababaye aba mbere bahembwe
Arakaza Leo Victor wigaga muri Wisdom School mu Karere ka Musanze, ni we wabaye uwa mbere mu bakoze ibizamini bya Leta bisoza amashuri abanza. Yagize amanota 99,4%.
Yakurikiwe na Impano Brave Gloria wo mu Karere ka Bugesera, Ihirwe Kanimba Honnette wo muri New Vision Primary School mu Karere ka Huye aba uwa Gatatu naho Duhirwe Gall Gavin Darcy wo muri Ecole International la Racine mu Bugesera aba uwa Kane.
Nsengiyumva Joannah Holiness nawe wiga mu Karere ka Bugesera niwe wabaye uwa Gatanu mu gihe Ashimwe Keza Geraldine na we wiga i Bugesera yabaye uwa Gatandatu.
Abana batanu bahize abandi mu cyiciro rusange ni Izere Hennock Tresor abaye ubwa mbere wagize 98,67% wiga kuri E.S Kanombe yo mu Karere ka Kicukiro
Uwumuremyi Arbert wagize 98,00% wize kuri Hope Haven School yo mu Karere ka Gasabo, Ineza Flora Elyse wagize 97,89% Hope Haven School yo mu Karere ka Gasabo
Ndayishimiye Jean D”Amour wagize 97,89 wize muri Haven School yo mu Karere ka Gasabo
Agaba Happy Jean Eudes wagize 97,78% wize kuri Petit Séminaire St Aloys yo mu Karere ka Rusizi.
Abo banyeshuri bose bahembwe mudasobwa ndetse bishyurirwa na Umwarimu SACCO umwaka wose, bahabwa n’ibikoresho by’ishuri.
Ushaka kureba amanota ye ajya ku rubuga rwa NESA. Umunyeshuri uri kureba amanota ahita abona n’aho yoherejwe kwiga.
NDEKEZI JOHNSON / UMUSEKE.RW
