Ishyirahamwe ry’Umukino w’Intoki wa Volleyball mu Rwanda [FRVB], ryatangaje ko shampiyona y’Icyiciro cya mbere 2025/2026 mu byiciro byombi, izatangira mu Ukwakira uyu mwaka.
Amakuru y’igihe umwaka w’imikino uzatangirira muri Volleyball, yemejwe na FRVB yabicishije ku mbuga nkoranyambaga za yo. Iri shyirahamwe ryavuze ko ku wa 17 Ukwakira 2025, ari bwo uyu mwaka w’imikino 2025/2026 uzatangira.
Uretse iki gihe cyatangajwe ko umwaka w’imikino uzatangirira muri Volleyball, hanatangajwe ko ku wa 20 Nzeri uyu mwaka, ari bwo hazatorwa Komite Nyobozi nshya ya FRVB mu myaka ine iri imbere.
Izindi mpinduka zatangajwe, ni umubare w’imikino ya kamarampaka ku kipe izegukana igikombe cya shampiyona mu bagabo n’abagore. Iyi mikino yavuye kuri itatu igera kuri itanu. Bivuze ko ikipe izajya yitwara neza muri iyi mikino itanu ari yo izajya yegukana igikombe cya shampiyona.
UMUSEKE.RW
