Ikipe ya Al-Ahli Tripoli yo muri Libya ikinamo Abanyarwanda babiri, Manzi Thierry na Bizimana Djihad, yegukanye igikombe cya shampiyona 2024/2025 nyuma yo gutsinda Al-Ahly Benghazi ibitego 2-0 mu mukino wa kamarampaka.
Imikino ya kamarampaka, yabereye mu gihugu cy’u Butaliyani. Uwagombaga gutanga ikipe yegukana igikombe cya shampiyona ya Libya 2024/2025, wabaye ku wa Kabiri tariki ya 12 Kanama 2025.
Al-Ahli Tripoli ya Manzi Thierry na Bizimana Djihad, ni yo yegukanye igikombe nyuma y’intsinzi y’ibitego 2-0. Iyi kipe yabifashijwemo na Manzi watsinze igitego ku munota wa gatanu w’umukino na H. Elhouni wagitsinze ku munota wa 83.
Ni igikombe cya 14 cya shampiyona, iyi kipe iri mu zikomeye muri Libya, yegukanye mu mateka ya yo. Ni umukino Bizimana Djihad usanzwe ari kapiteni w’Amavubi, atakinnye kubera imvune amaranye iminsi.
UMUSEKE.RW
