Rusizi: Hari umusore wo mu murenge wa Nyamyumba, akarere ka Rubavu wari umukozi wo ku cyombo (ubwato) mu karere ka Rusizi warohamye mu kiyaga cya Kivu.
Ibi byago byabereye mu mudugudu wa Karambo, akagari ka Cyangugu mu murenge, wa Kamembe akarere ka Rusizi, byamenyekanye mu gitondo cyo kuri uyu wa Gatandatu tariki ya 09 Kanama, 2025.
Uyu musore warohamye mu Kivu yitwa Dusabimana w’imyaka 26 y’amavuko, yabaga i Rusizi mu buryo bwo gushaka amafaraga, yari asanzwe akora akazi k’ubukarani ku byombo.
Umunyamabanga Nshingwabikorwa w’umurenge wa Kamembe, Ingabire Joyeux yabwiye UMUSEKE ko uyu musore yarohamye mu gitondo bikewa ko ari impanuka.
Ati “Amakuru ni yo, umusore w’imyaka 26 y’amavuko wo mu murenge wa Nyamyumba, akarere ka Rubavu yarohamye mu Kivu, mu gitondo. Twahageze dusanga yamaze kwitaba Imana, turakeka ko byatewe n’impanuka. Umurambo we turawujyana mu bitaro gukora isuzuma turebe icyateye impanuka.”
Ingabire yihanganishije umuryango wabuze umuntu, yibutsa abaturage ko uwegereye amazi by’umwihariko ikiyga agomba kwambara imyambaro yabugenewe kuko mu gihe habaye impanuka byakorohera abatanga ubutabazi.
Umurambo wa Nyakwigendera urajyanywa mu bitaro gukorerwa isuzuma n’abaganga.
MUHIRE Donatien
UMUSEKE.RW / RUSIZI.
