Biciye mu bufatanye bw’Ishyirahamwe ry’Umupira w’Amaguru mu Rwanda [FERWAFA] n’iriyobora umupira w’amaguru ku Isi [FIFA], abayobozi b’amakipe yo mu cyiciro cya Kabiri, batangiye guhabwa amahugurwa ku bijyanye n’imicungire y’amakipe.
Ku wa mbere, tariki ya 28 Nyakanga 2025 mu Akarere ka Rubavu, hatangiye amahugurwa ari guhabwa abayobozi n’abandi bafite inshingano mu makipe y’abagore yo mu cyiciro cya Kabiri. Ni amahugurwa azamara iminsi itatu, agamije kubongerera ubumenyi mu bijyanye n’imicungire y’amakipe.
Impuguke za FIFA zisanzwe zifite inshingano zo gukurikirana umupira w’abagore muri Afurika, Sibanda Thuba ukomoka muri Zimbabwe na mugenzi we, Armel Azihary ukomoka mu Birwa bya Comorés, ni bo bari gutanga aya mahugurwa yafunguwe ku mugaragaro na Munyanka Ancille ufite inshingano zo kureberera Iterambere rya ruhago y’abagore muri Ferwafa.
Mu bandi bari gukurikirana aya mahugurwa, harimo abagize Komisiyo Ishinzwe umupira w’abagore muri Ferwafa, umutoza mukuru w’ikipe y’Igihugu y’u Rwanda y’umupira w’amaguru y’abagore ndetse akaba n’ushinzwe Iterambere rya ruhago y’abagore mu Rwanda, Casa Mbungo André n’abandi.
Ku munsi wa mbere, Thuba yaganirije abari guhugurwa, abibutsa uko bakwiye kuba bita ku micungire myiza mu makipe babereye abayobozi.
Yishimiye kandi aho u Rwanda rugeze mu guteza imbere ruhago y’abagore ariko avuga ko bidahagije. Yavuze kandi ko yahaye umukoro Ferwafa wo gushyiraho amarushanwa y’abato ahoraho yaba mu bari munsi y’imyaka 15,17, 20 n’ibindi byiciro.
Mugenzi we, Armel we ubwo yahuguraga aba bayobozi, yabibukije ko kimwe mu byatuma bagera ku ntsinzi yo gutunga ikipe nziza, ari ukubahana kw’inzego. Yabibukije ko mu miyoborere myiza y’ikipe, bidakwiye ko umuyobozi w’ikipe ari we uba ukwiye gukora byose wenyine nyamara hari izindi nzego bakorana akwiye kubaha kugira ngo basenyere umugozi umwe.
Azihary yabibukije ko umuyobozi mwiza, ari uwubaha ndetse agaha agaciro buri rwego rwose rw’ikipe uhereye ku bacunga ibikoresho kugeza ku bamwungirije bari hafi ye. Yavuze ko ibi bituma ikipe itera imbere kuko inzego ziba zuzuzanya.
Uretse izi nzobere za FIFA, hari n’abakozi ba Ferwafa batanze ibiganiro bigufi ariko byibanze ku kubahiriza amategeko kw’amakipe. Mu babitanze, harimo Me. Gasarabwe Claudine usanzwe ari Komiseri w’Amategeko muri iri shyirahamwe ndetse na Abel.
Abahuguye nta bwo bihariye ijambo gusa ahubwo banahaye umwanya abari guhugurwa kugira ngo babaze cyangwa basobanuze ku bya bari guhugurwaho, barasubizwa ndetse bavuga ko basobanukiwe.
Nyuma y’aya mahugurwa y’abo mu cyiciro cya Kabiri, byitezwe ko n’abo mu cyiciro cya mbere bazahugurirwa i Kigali mu minsi iri imbere.
UMUSEKE.RW
