Nyanza: Kuri sitasiyo ya Polisi ya Mukingo mu karere ka Nyanza hafungiye umusaza ukekwaho gushaka gutema umuyobozi.
UMUSEKE wamenye amakuru ko mu karere ka Nyanza mu murenge wa Mukingo, mu kagari ka Ngwa, mu mudugudu wa Mwanabiri umusaza witwa KARAMIRA w’imyaka 66 yafashwe akekwaho gushaka gutema umukuru w’umudugudu akoresheje umuhoro.
MBONIGABA Thomas w’imyaka 40 usanzwe ari umukuru w’umudugudu wa Mwanabiri, ngo habaye urugomo ubwo umukuru w’umudugudu yajyaga gutera imbago mu isambu y’umuryango w’uriya musaza KARAMIRA mu rwego rwo kubafasha, maze Karamira ntiyanyurwa n’uburyo ubutaka bwateweho imiyenzi.
Nibwo ngo Karamira yasumiriye umukuru w’umudugudu ngo amutemeshe umuhoro, undi atabaza abaturage bafata uwo musaza ataramutema.
Umuvugizi wa Polisi mu ntara y’Amajyepfo SP Emmanuel HABIYAREMYE yabwiye UMUSEKE ko uriya musaza yafashwe akaba ari gukurikiranwa hakurikijwe amategeko.
Uwafashwe yashyikirijwe Polisi sitasiyo ya Mukingo.
Theogene NSHIMIYIMANA
UMUSEKE.RW i Nyanza
