Urukiko rw’Ibanze rwa Nyamabuye rwasubitse Urubanza ruregwamo Avocat ukekwa gusambanya Umwana.
Isomwa ry’Urubanza ryabaye kuri uyu wa Gatanu Taliki ya 11 Nyakanga 2025 umunsi Urukiko rw’Ibanze rwa Nyamabuye rwari rwemeje mu iburanisha ry’ubushize.
Urukiko rwavuze ko ikibazo cy’Ikoranabuhanga n’akazi kenshi Umucamanza yagize byatumye Urubanza ruregwamo Umwunganizi mu mategeko rusubikwa.
Urukiko rwemeje ko Urubanza rwimurirwa Tariki ya 23 Nyakanga 2025 saa cyenda z’Umugoroba.
Mu iburanisha ry’ubushize ryabaye Tariki ya 08 Nyakanga 2025 Ubushinjacyaha bwasabye ko bibera mu muhezo kubera ko uwahohotewe ari umwana utarageza imyaka y’ubukure.
Ni uburanisha ku ifungwa n’ifungurwa ry’uyu mwunganizi mu mategeko(Avocat) akekwaho gusambanya Umukobwa w’Imyaka 16.
Uwo munsi ifatwa ry’iki cyemezo ryabanje gukurura impaka hagati y’abunganizi batatu bari ku ruhande rwe n’Ubushinjacyaha buhagarariye ukekwaho guhohoterwa.
Urukiko rufata umwanzuro ko abantu bose harimo Umuryango w’uregwa, n’abunganizi bari baje gukurikirana iburanisha basohoka.
Isomwa ry’iki cyemezo ryabaye Abunganizi, uregwa badahari, gusa mu cyumba cy’Iburanisha harimo abantu babiri.
MUHIZI ELISÉE
UMUSEKE.RW/Muhanga.
