Kaminuza yitwa “Université des Hautes Technologies des Grands Lacs” iherereye mu Mujyi wa Goma muri Repubulika Iharanira Demokarasi ya Congo, yagiranye ubufatanye n’Irerero rya Nyabihu Young Boys Football Club ryo mu Akarere ka Nyabihu, mu bijyanye no kurifasha kuzamura impano z’abato babarizwa muri iri rerero.
Iri rerero rya “Nyabihu Young Boys Football Club”, riherereye mu Akarere ka Nyabihu mu Intara y’Iburengerazuba. Rifite abana bari mu byiciro by’imyaka kuva kuri itanu kugeza kuri 18.
Amakuru UMUSEKE wamenye, ni uko ryagiranye amasezerano y’ubufatanye na Kaminuza ya “Université des Hautes Technologies des Grands Lacs” iherereye mu Mujyi wa Goma muri Repubulika Iharanira Demokarasi ya Congo.
Iyi Kaminuza ifite amashami arimo ibijyanye n’Ubumenyimuntu [Domaine de sciences de l’homme et de la société], amategeko, politike n’imiyoborere [Domaine de sciences Juridique, Politique et Administrative], imicungire y’imari [Domaine de sciences Economique et de Gestion], ubumenyi kundwara zo mu mutwe n’imyigishirize [Domaine de Psychologie et Science de l’Education], kuvura amatungo no kubungabunga ibidukikije [Domaine de Science Agronomies et Environment n’ibijyanye n’itangazamakuru n’itumanaho [Domaine de Sciences de l’Information et de la Communication].
Amakuru UMUSEKE wamenye, avuga ko abana bazabasha kurangiza amashuri yisumbuye iri rerero rigifitanye amasezerano n’iyi Kaminuza, bazemererwa kujya kuhiga bakoroherezwa ku bijyanye n’amafaranga y’ishuri.
Indi nyungu iri ku ruhande rwa Young Boys Football Club, ni ibikoresho iri rerero rihabwa n’iyi Kaminuza birimo imyenda n’ibindi bikoresho bifasha mu myitozo. Ikirenze kuri ibyo kandi, babaha amafaranga yo kwifashisha mu ngendo mu gihe bafite imikino.
Ubuyobozi bw’iri rerero, buvuga ko bukomeje kwishimira iyi mikoranire imaze imyaka itandatu ariko igenda itanga umusaruro wo kwishimira ku ruhande rwa ryo.
UMUSEKE.RW
